NEWSNOW | – වර්තමානය තුළ මෙරට පුද්ගලයින් තුන්ලක්ෂ හැටපන්දහස් නවසිය පනස් එකක (365,951) පිරිසක් රැකියා විරහිතභාවයෙන් පෙළෙන බව අග්‍රාමාත්‍ය හරිනි අමරසූරිය අනාවරණය කළාය.
ඇය මේ බව අනාවරණය කළේ විපක්ෂනායක සජිත් ප්‍රේමදාස මහතා විසින් අද (26) පාර්ලිමේන්තුවේ දී යොමු කළ පැනයකට පිළිතුරු ලබා දෙමිනි.
2024 ශ්‍රම බලකා වාර්තාවට අනුව 2024 වසරේ 4.5ක් වූ පළමු කාර්තුවේ විරැකියා අනුපාතය 2025 දී 3.8ක් දක්වා පහළ ගොස් ඇති බවද එහිදී ඇය අවධාරණය කර සිටියාය.
එමෙන්ම 2024 වසරේ දෙවන කාර්තුවේ 4.7ක්ව පැවති විරැකියා අනුපාතය 2025 වසරේ දී 3.8ක් දක්වා පහළ බැස ඇති බවද අග්‍රාමාත්‍යවරිය පැවසීය.
එහිදී ඇය වැඩිදුරටත් පැවසුවේ අධ්‍යාපන සුදුසුකම් අනුව විරැකියාවෙන් පෙළෙන පුද්ගල සංඛ්‍යාව අපොස සාමාන්‍ය පෙළට පහළ, එක්ලක්ෂ තුන්දහස් තුන්සිය අටක (103,308) ප්‍රමාණයක් සිටින බවත් අපොස සාමාන්‍ය පෙළ සමත් පිරිස අනූඑක් දහස් හාරසිය පහක් (91,405) වන බවත් ය.
අපොස උසස් පෙළ සමත්, එක්ලක්ෂ විසි අටදහස් නවසිය අසූ හතරක් (128,984) මෙසේ විරැකියාවෙන් පෙළෙන බව සඳහන් කළ අග්‍රාමාත්‍යවරිය උපාධිය සහ ඊට ඉහළ අධ්‍යාපන සුදුසුකම් ඇති 42,254ක ප්‍රමාණයක් විරුකියාවෙන් පෙළෙන බව පැවසුවාය.