NEWSNOW | – මියන්මාරයේ සයිබර් අපරාධ කඳවුරු වල සිරකර සිටියදී බේරා ගැනුණු ශ්‍රී ලාංකිකයින් යළි රැගෙන ඒම සම්බන්ධයෙන් විදේශ කටයුතු අමාත්‍ය විජිත හේරත් අද(13) තායිලන්ත විදේශ කටයුතු අමාත්‍ය මාරිස් සංගියපොන්සා මහතා සමඟ සාකච්ඡා කර තිබේ.
තායිලන්තයේ විදේශ කටයුතු අමාත්‍යවරයා සමඟ පැවති දුරකථන සංවාදයකදී අමාත්‍ය හේරත් මහතා තායිලන්තය සමඟ ද්විපාර්ශ්වික සහයෝගීතාව ශක්තිමත් කිරීම සඳහා ශ්‍රී ලංකාවේ කැපවීම ද යළි තහවුරු කළේය.
දෙරට අතර රාජ්‍ය තාන්ත්‍රික සබඳතාවල වැදගත්කම අවධාරණය කළ අමාත්‍ය හේරත්, මේ වසරේ අප්‍රේල් මාසයේදී පැවැත්වීමට නියමිත බිම්ස්ටෙක් සමුළුවට පෙර තායිලන්තයේ බිම්ස්ටෙක් සභාපතිත්වය සඳහා ශ්‍රී ලංකාව අඛණ්ඩව සහයෝගය දක්වන බව ප්‍රකාශ කළේය.
මියන්මාරයේ Myawaddy ප්‍රදේශයේ සයිබර් අපරාධ මධ්‍යස්ථාන වෙත ප්‍රවාහනය කරන ලද ශ්‍රී ලාංකිකයන් බේරා ගැනීමට සහ නැවත මෙරටට ගෙන්වා ගැනීමට තායිලන්තයේ අඛණ්ඩ සහයෝගය පිළිබඳව ද ඔහු කෘතඥතාව පළ කළේය.
2023 වසරේ සිට තායිලන්තය මිනිස් ජාවාරම් සින්ඩිකේට් විසින් බලහත්කාරයෙන් රඳවාගෙන සිටි ශ්‍රී ලාංකිකයන් 58 දෙනෙකුට ආරක්ෂිතව ආපසු පැමිණීමට පහසුකම් සලසා ඇත.
මෙම මධ්‍යස්ථානවල වධ හිංසාවලට සහ අයුතු ලෙස සැලකීමට ලක්වන බව වාර්තා වන ඉතිරි ශ්‍රී ලාංකිකයන් 18 දෙනා බේරාගෙන නැවත ගෙන්වා ගැනීම සඳහා තායිලන්තයේ කඩිනම් සහයෝගීතාව ලබා දෙන ලෙස අමාත්‍ය හේරත් ඉල්ලා සිටියේය.
තායිලන්ත විදේශ අමාත්‍යවරයා ශ්‍රී ලංකාවට ප්‍රවාහනය කරන ලද ඉතිරි ශ්‍රී ලාංකිකයන් බේරා ගැනීමේ ප්‍රයත්නයට සහාය වීමට සහතික විය.
ශ්‍රී ලංකා විදේශ අමාත්‍යාංශය නිවේදනයක් නිකුත් කරමින් කියා සිටියේ තායිලන්ත සහ මියන්මාර රජයන්හි සහය ඇතිව Myawaddy හි ඉතිරිව සිටින ශ්‍රී ලාංකිකයින් බේරා ගැනීමට සහ නැවත ගෙන්වා ගැනීමට අඛණ්ඩව උත්සාහ කරන බවයි.