2027 වසර සඳහා වන විසර්ජන පනත් කෙටුම්පත හෙට (12) පස්වරුවේ පාර්ලිමේන්තුවේදී මුදල් අමාත්‍යවරයා වන අනුර කුමාර දිසානායක ජනාධිපතිතුමා විසින් ඉදිරිපත් කිරීමට නියමිත අතර, එදින පාර්ලිමේන්තුව ප.ව. 1.30ට රැස්වීමට නියමිතය. 2026 ඔක්තෝබර් 07 වැනි දින පළමුවර කියවීම සඳහා පාර්ලිමේන්තුවට ඉදිරිපත් කළ මෙම පනත් කෙටුම්පතට අදාළ අයවැය විවාදය නොවැම්බර් 13 සිට දෙසැම්බර් 14 දක්වා සෙනසුරාදා දින 4ක් ඇතුළුව දින 26ක කාලයක් පුරා පැවැත්වේ.
ඒ අනුව, අයවැය දෙවන කියවීමේ විවාදය නොවැම්බර් 13 සිට 20 දක්වා දින 7ක් පැවැත්වී නොවැම්බර් 20 වැනි දින ප.ව. 6.00ට ඡන්ද විමසීම සිදුකෙරෙන අතර, කාරක සභා අවස්ථාවේ විවාදය නොවැම්බර් 21 සිට දෙසැම්බර් 14 දක්වා දින 19ක් පුරා පවත්වා අවසාන තෙවන කියවීමේ ඡන්ද විමසීම දෙසැම්බර් 14 වැනි දින ප.ව. 6.00ට පැවැත්වීමට නියමිතව ඇත.
අයවැය කාලසීමාව තුළ සෑම දිනකම ප.ව. 9.30 සිට 10.00 දක්වා ස්ථාවර නියෝග 22 යටතේ පාර්ලිමේන්තු කටයුතු සඳහාත්, ප.ව. 10.00 සිට 10.30 දක්වා වාචික පිළිතුරු අපේක්ෂා කරන ප්‍රශ්න 5ක් සඳහාත්, ප.ව. 10.30 සිට 11.00 දක්වා ස්ථාවර නියෝග 27(2) යටතේ ප්‍රශ්න 1ක් සඳහාත් කාලය වෙන් කර ඇති අතර, ප.ව. 11.00 සිට ප.ව. 6.00 දක්වා අයවැය විවාදය පැවැත්වේ.
මීට අමතරව, ඡන්ද විමසීම් පැවැත්වෙන නොවැම්බර් 20 සහ දෙසැම්බර් 14 යන දින හැර සෙසු සෑම දිනකම ප.ව. 6.00 සිට ප.ව. 6.30 දක්වා කාලය සභාව කල් තබන අවස්ථාවේ යෝජනා විවාදයට ගැනීමට වෙන් කර ඇත.