පාකිස්තානයේ සිරගත කර සිටින හිටපු අගමැති ඉම්රාන් ඛාන් නිදහස් කරන ලෙස ඉල්ලමින් ඔහුගේ පීටීඅයි (PTI) පක්ෂයේ ආධාරකරුවන් දහස් ගණනක් කයිබර් පක්තුන්ක්වා ප්‍රාන්ත මහ ඇමති සොහෙල් අෆ්රිඩිගේ ප්‍රධානත්වයෙන් විරෝධතා පාගමනක නිරත වෙති.
ඔක්තෝබර් 04 වැනි දින ආරම්භ වූ මෙම පාගමන පස්වන දිනටත් ළඟා වෙමින් පෙෂාවර් නගරයට ඇතුළු වූ අතර, රජය සමඟ පැවති සාකච්ඡා අසාර්ථක වීමෙන් පසු පක්ෂය මෙම විරෝධතා මාලාව දියත් කර ඇත. පාගමන හේතුවෙන් පෙෂාවර්හි ප්‍රදේශ කිහිපයක ජංගම දුරකථන සහ අන්තර්ජාල සේවා තාවකාලිකව අත්හිටුවීමට පියවර ගෙන තිබේ.
දේශපාලන කටයුතු සඳහා රජයේ හෙලිකොප්ටරයක් භාවිත කළ බවට එල්ල වූ චෝදනාවකට අදාළව පෙෂාවර් මහාධිකරණය විසින් මහ ඇමතිවරයාගෙන් පිළිතුරක් ඉල්ලා ඇති අතර, රජය සමඟ සාකච්ඡා කිරීමට තවදුරටත් සූදානම් බව පක්ෂ සභාපති බැරිස්ටර් ගෝහාර් ඛාන් ප්‍රකාශ කර ඇත.
ඉම්රාන් ඛාන්ගේ නිදහස තවදුරටත් ඉල්ලා සිටින පීටීඅයි පක්ෂය ඉදිරි දිනවලදී මර්දාන් සහ ස්වාබි හිදී තවත් රැස්වීම් පැවැත්වීමට නියමිතය.