සති අන්තයේ ඇදහැළුණු නොනවත්වා පැවැති අධික වර්ෂාවෙන් පසු තායිලන්තයේ අගනුවර පවතින ගංවතුර තත්ත්වය සඳුදා වන විට සෙමින් පහව යමින් පවතින නමුත්, ඇතැම් ප්රදේශ සහ ප්රධාන මාර්ග තවදුරටත් ජලයෙන් යටවී පවතියි.
අතරින් පතර වැසි පැවතුණද, ජලය බැසයාමේ කටයුතු වේගවත් කිරීමට තරම් තත්ත්වය යහපත් වී ඇති බව බැංකොක් නගර නිලධාරීන් පැවසීය. සති අන්තයේදී ප්රධාන ඇල මාර්ග හතරක ජල මට්ටම අධික ලෙස ඉහළ යාම නිසා අවට ප්රදේශවලින් ගලා එන ජලය බැසයාමට බාධා එල්ල වී තිබුණි.
තායිලන්තයේ බොහෝ ප්රදේශවලට තවදුරටත් වැසි සහිත කාලගුණයක් පුරෝකථනය කර ඇති අතර, බැංකොක් නගරයට ලැබෙන වර්ෂාපතනය අඩුවනු ඇතැයි අපේක්ෂා කෙරේ. මීට අමතරව කාම්බෝජය සහ මියන්මාරය ද දැඩි අයහපත් කාලගුණික තත්ත්වයකට මුහුණ දෙමින් සිටියි.
බැංකොක් ගංවතුර පාලන මධ්යස්ථානය නිකුත් කළ වාර්තා උපුටා දක්වමින් නියෝජ්ය ආණ්ඩුකාර තවිඩා කමොල්වෙජ් (Tavida Kamolvej) සඳහන් කළේ, සති අන්තයේ පැවැති ගංවතුරෙන් පවුල් 329,000කට එනම් පුද්ගලයින් 700,000කට ආසන්න සංඛ්යාවකට බලපෑම් එල්ල වී ඇති බවයි. නගරය තුළ ගංවතුර හේතුවෙන් පුද්ගල මරණ 2ක් සහ දිවයින පුරා අවම වශයෙන් මරණ 10ක් වාර්තා වී ඇති බව තායි මාධ්ය සඳහන් කළේය.
ආණ්ඩුකාර චැඩ්චාට් සිට්ටිපුන්ට් (Chadchart Sittipunt) විසින් සෙනසුරාදා දිනයේදී නගරයේ සියලුම දිස්ත්රික්ක 50 පුරා ගංවතුර හදිසි තත්ත්වයක් ප්රකාශයට පත් කරන ලද අතර, ඇතැම් දිස්ත්රික්කවලට ඉන් වැඩි බලපෑමක් එල්ල වී නොතිබුණි. වයෝවෘද්ධ පුද්ගලයින් සහ ආබාධිත පුද්ගලයින් ඇතුළු අවදානමට ලක්විය හැකි පිරිස් වෙත සහනාධාර ලබාදීම හෝ ඔවුන් ඉවත් කිරීම මගින් අත්යවශ්ය සහාය ලබාදීමට බලධාරීන් ප්රමුඛතාව ලබාදෙන බව ඔහු පැවසීය. නගර නිලධාරීන් පැවසුවේ පුද්ගලයින් 7,000කට ආසන්න සංඛ්යාවක් දැනට සුබසාධන මධ්යස්ථානවල රැඳී සිටින බවයි.
නැගෙනහිර බැංකොක්හි පිහිටි ප්රදේශ සඳහා මෙමගින් දැඩි ලෙස බලපෑම් එල්ල විය. අගමැති අනුටින් චාන්විරාකුල් (Anutin Charnvirakul) ඉරිදා රාත්රියේ බං කපි (Bang Kapi) දිස්ත්රික්කයේ දැඩි ලෙස ජලයෙන් යටවූ නිවාස සංකීර්ණයක් නිරීක්ෂණය කිරීමට සහ සහනාධාර බෙදාදීමට එක්ව සිටියේය.
සඳුදා වන විට බං කපි හි දුම්රිය ස්ථානයක් සහ වෙළඳ සංකීර්ණයක් ආසන්නයේ දණහිස් මට්ටම දක්වා ජලය පිරී තිබුණි. වරින් වර ඇදහැළුණු වර්ෂාව මධ්යයේ වුවද, පාරිභෝගිකයින් ජලය මැදින් ගමන් කරමින් බඩු බාහිරාදිය රැගෙන ගිය අතර, ඇතැම් පිරිස් වෙළඳ සංකීර්ණය මගින් සපයා තිබූ කුඩා බෝට්ටුවකින් දුම්රිය ස්ථානය වෙත ගමන් කළහ.