ගාසා තීරයේ යුද්ධයෙන් විපතට පත් වූවන්ට ප්‍රතිකාර කිරීම සඳහා ස්වේච්ඡාවෙන් ඉදිරිපත් වූ හිටපු අමෙරිකානු හමුදා සටන් වෛද්‍යවරයකු වන ආචාර්ය ඇඩම් හම්වි (Dr. Adam Hamawy), නිව් ජර්සි ප්‍රාන්තයේ 12 වැනි කොංග්‍රස් දිස්ත්‍රික්කය නියෝජනය කරමින් නියෝජිත මන්ත්‍රී මණ්ඩලයේ (House of Representatives) අසුනක් දිනා ගැනීමට සමත්ව ඇත. ඔහු මෙම ජයග්‍රහණය ලබාගැනීමත් සමඟම, නිව් ජර්සි ප්‍රාන්තය නියෝජනය කරමින් කොංග්‍රසයට පත් වූ පළමු මුස්ලිම් ජාතිකයා ලෙස ද ඉතිහාසයට එක් විය.
ප්‍රගතිශීලී දේශපාලන මත දරන්නෙකු ලෙස ප්‍රසිද්ධියට පත්ව සිටින හම්වි, මැතිවරණ ව්‍යාපාරයේදී විශේෂ අවධානයක් දිනාගත්තේ ඊශ්‍රායලයට ලබාදෙන අමෙරිකානු ආධාර අවසන් කළ යුතු බවට දැඩි ස්ථාවරයක පිහිටමින් සහ පලස්තීන ජනතාවට එරෙහි ප්‍රහාර හෙළා දකිමිනි. ඔහු ගැටුම්කාරී ප්‍රදේශවල (විශේෂයෙන් ඉරාක යුද්ධයේදී සහ ගාසා තීරයේ) වෛද්‍යවරයකු ලෙස අත්විඳි අතිශය දුෂ්කර අත්දැකීම් පදනම් කරගනිමින්, යුද ක්‍රියාකාරකම් සඳහා වැය කරන ජනතා බදු මුදල් අමෙරිකාව තුළ සෞඛ්‍ය සේවය, අධ්‍යාපනය සහ නිවාස පහසුකම් වැනි ජනතා සුබසාධනය සඳහා යොදවන ලෙස ප්‍රබල ලෙස හඬ නඟා තිබේ.
ඇමෙරිකානු දේශපාලනය තුළ ඩිමොක්‍රටික් පක්ෂය නියෝජනය කරන ඔහු, සෙනෙට් සභික බර්නි සෑන්ඩර්ස් වැනි ප්‍රමුඛ පෙළේ ප්‍රගතිශීලී නායකයින්ගේ ද සහයෝගය ලබා ගනිමින් දැඩි තරගකාරී මැතිවරණ සමයක් ජයග්‍රහණය කිරීමට සමත් විය. මෙම මැතිවරණ ජයග්‍රහණය අමෙරිකානු කොංග්‍රස් මණ්ඩලය තුළ පලස්තීන ගැටලුව සහ මධ්‍යම ආන්ඩුවේ විදේශ ප්‍රතිපත්ති පිළිබඳ දැඩි සංවාදයක් යළි මතු කිරීමට සමත්ව ඇත.