ඉරාන පාලන තන්ත්‍රය විසින් ඛනිජ තෙල් සහ පෙට්‍රෝකෙමිකල් නිෂ්පාදන විදේශීය වෙළෙඳපොළට ප්‍රවාහනය කිරීමට භාවිත කරන ප්‍රධාන නැව් සමූහයකට එරෙහිව ඇමෙරිකා එක්සත් ජනපද මුදල් අමාත්‍යාංශය දැඩි සම්බාධක පැනවීමට කටයුතු කර තිබේ.
‘Operation Economic Outcast’ නමැති විශේෂ මෙහෙයුමේ පස්වන අදියර යටතේ ක්‍රියාත්මක වූ මෙම පියවර හරහා, ඉරානයේ රහසිගත තෙල් ප්‍රවාහන ජාලයෙන් බහුතරයක් සම්පූර්ණයෙන්ම අක්‍රිය කිරීමට හැකි වූ බව ඇමෙරිකානු බලධාරීන් පවසයි.
ඇමෙරිකානු මුදල් අමාත්‍යාංශයේ විදේශ වත්කම් පාලන කාර්යාලය (OFAC) විසින් ක්‍රියාත්මක කරන ලද මෙම මෙහෙයුමේදී, ඉරාන තෙල් ප්‍රවාහනයට සම්බන්ධ නෞකා 17ක් සහ ඊට අදාළ ජාත්‍යන්තර සමාගම් රැසක් සම්බාධක ලැයිස්තුවට ඇතුළත් කර ඇත.
මූල්‍ය අර්බුද හමුවේ ඉරානය සිය නීතිවිරෝධී තෙල් අලෙවියෙන් උපයන ඩොලර් බිලියන ගණනක ආදායම වැළැක්වීම මෙම පියවරේ ප්‍රධාන අරමුණ බව ඇමෙරිකා එක්සත් ජනපද මුදල් අමාත්‍යාංශය පෙන්වා දෙයි.
ඉරාන පාලන තන්ත්‍රය කලාපීය නොසන්සුන්තාවන් සඳහා මූල්‍ය ප්‍රතිපාදන යෙදවීම වැළැක්වීම අරමුණු කරගනිමින් මෙම තීරණය ගත් බව ඇමෙරිකානු භාණ්ඩාගාර ලේකම් ස්කොට් බෙසන්ට් (Scott Bessent) වැඩිදුරටත් සඳහන් කර ඇත.