ගාසා තීරයේ ක්රියාත්මක පලස්තීන හමාස් සංවිධානය ඇතුළු අනෙකුත් සන්නද්ධ කණ්ඩායම් සම්පූර්ණයෙන්ම නිරායුධ කිරීම සඳහා තමන් විසින් නම් කරන ලද “Board of Peace” මණ්ඩලය එකඟතාවකට පැමිණ ඇති බව ඇමෙරිකානු ජනාධිපති ඩොනල්ඩ් ට්රම්ප් ප්රකාශ කර තිබේ. සිය ‘Truth Social’ ගිණුමෙහි සටහනක් තබමින් ජනාධිපතිවරයා පෙන්වා දෙන්නේ, මෙම එකඟතාව ඊශ්රායල–ගාසා යුද්ධය නිමා කිරීම වෙනුවෙන් යෝජිත “Trump 20-Point Plan” සැලැස්ම ක්රියාත්මක කිරීමේ තීරණාත්මක සන්ධිස්ථානයක් වන බවයි. අදියර කිහිපයක් යටතේ ක්රියාත්මක වන මෙම ගිවිසුම හරහා නිරායුධකරණ ක්රියාවලිය ඉදිරියට යන විට ඊශ්රායල හමුදා ගාසා තීරයෙන් ඉවත් කර ගැනීමට නියමිත අතර, ඉන්පසු එහි ආරක්ෂක කටයුතු ජාත්යන්තර ස්ථාවරකරණ බලකායක් සහ නව පලස්තීන පොලිස් බලකායක් වෙත පැවරෙනු ඇත.
මෙම ඓතිහාසික එකඟතාව සාක්ෂාත් කර ගැනීම සඳහා මැදිහත්කරුවන් ලෙස කටයුතු කළ ඊජිප්තුව, කටාර් සහ තුර්කිය යන රටවලට සිය කෘතඥතාව පළ කරන බව ද ජනාධිපති ට්රම්ප් සඳහන් කළේය. ඔහු වැඩිදුරටත් අවධාරණය කරන්නේ මෙම පියවර හරහා ගාසා තීරය නව පලස්තීන රජයක් යටතේ පාලනය වීමට මඟ පෑදෙන බවත්, එමඟින් පලස්තීන ජනතාවට අවශ්ය සහාය ලැබෙන අතරම ඊශ්රායලයේ ආරක්ෂාව ද උපරිමයෙන් තහවුරු වන බවත්ය. ඒ සමඟම, ඇමෙරිකානු මැදිහත්වීමෙන් යෝජනා වූ මෙම සාම සැලැස්ම ක්රියාත්මක කිරීම සම්බන්ධයෙන් කයිරෝ නුවරදී මැදිහත්කරුවන් සහ හමාස් නායකයන් අතර පැවති සාකච්ඡාවල යම් ප්රගතියක් දක්නට ලැබෙන බව ද අභ්යන්තර ආරංචි මාර්ග පවසයි.
කෙසේ වෙතත්, මෙම යෝජිත කොන්දේසි ඊශ්රායලයේ ආරක්ෂාව වෙනුවෙන් ප්රමාණවත් නොවන බව එරට නිලධාරියෙකු ප්රකාශ කර තිබේ. දේශපාලන මට්ටමින් මෙලෙස සාම සාකච්ඡා ඉදිරියට ඇදුණ ද භූමියේ පවතින යුදකාමී වටපිටාව තවදුරටත් දරුණු වෙමින් පවතී. ගාසා වෛද්ය ආරංචි මාර්ග වාර්තා කරන පරිදි, පසුගිය බ්රහස්පතින්දා ඊශ්රායල හමුදා එල්ල කළ ගුවන් ප්රහාර හේතුවෙන් කුඩා දරුවන් දෙදෙනෙකු ඇතුළුව අවම වශයෙන් පලස්තීනුවන් හය දෙනෙකු ජීවිතක්ෂයට පත්ව ඇත.