NEWSNOW| – ලෝකයේ මහාද්වීප හතේ උසම කදු මුදුන් 07 තරණය කළ ජොහාන් පීරිස් , සිය අවසන් කදු මුදුන වන උතුරු ඇමෙරිකාවේ ඇලස්කා හි පිහිටි ඩිනාලි කදු මුදුන ද ( Mount Dinali ) තරණය කර අද(08) දින අලුයම කටුනායක ගුවන් තොටුපොළ වෙත පැමිණියේය.
ඒ අනුව මේ වනවිට ලෝකයේ මහාද්වීප හතේ උසම කදු මුදුන් හතම තරණය කිරීමට ජොහාන් පීරිස් මහතා සමත් වී තිබේ .
2014 වසරේ අප්‍රිකානු මහාද්වීපයේ කිලිමැන්ජාරෝ කන්ද තරණය කිරීමෙන් ජොහාන් පීරිස් මහතා ආරම්භ කළ ලොව මහාද්වීපය හතේ උසම කදු තරණය , වසර 11 කට පසුව උතුරු ඇමෙරිකාවේ ඩිනාලි කන්ද තරණය කිරීමෙන් නිමාවට පත් කිරීමට සමත් වී තිබේ .
ජොහාන් පීරිස් අප්‍රිකානු මහාද්වීපයේ කිලිමැන්ජාරෝ , ආසියානූ මහාද්වීපයේ එවරස්ට් , යුරෝපා මහාද්වීපයේ රුසියාවේ එල්බ්‍රෙස් , දකුණු ඇමෙරිකාවේ ඇකන්කගුවා , ඇන්ටාටිකා මහාද්වීපයේ වින්සන්ට් , ඕස්ට්‍රේලියා මහාද්වීපයේ කොසිඔස්කෝ සහ උතුරු ඇමෙරිකාවේ ඩිනාලි කන්ද තරණය කරමින් ශ්‍රී ලංකාවේ ධජය එම කදු මුදුන් මත සවි කරමින් මෙරටට අභිමානය සහ කීර්තිය ගෙන ඒමට සමත් විය.
අවසාන කදු මුදුන ද තරණය කළ ජොහාන් පීරිස් මහතා අද දින අලුයම 03.07 දෝහා සිට කටාර් ගුවන් සේවයේ කිව්.ආර්.- 658 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබූ අතර ඔහු පිළිගැනීමට ඔහුගේ පවුලේ ඥාතීන් මෙන්ම ඔහුගේ සහෝදර සේවක සේවිකාවන් සහ ඔහුගේ අනුග්‍රාහක භවතුන්ගේ නියෝජිතයන් පිරිසක් ද ගුවන් තොටුපොළ වෙත පැමිණ සිටියහ.
ජොහාන් පීරිස් මහතා කොළඹ නගරයේ සහ තරු පංතියේ හෝටල් කීපයකත් , එංගලන්තයේ ලන්ඩන් නුවර සහ ඕස්ට්‍රේලියාවේත් කොණ්ඩා සැකසුම් මධ්‍යස්ථාන පවත්වා ගෙන යන කොණ්ඩා සැකසුම් ශිල්පියෙකි .
ජොහාන් පීරිස් මහතා අනාගතයේ දී මෙම කදු තරණය කිරීම පිළිබද අත්දැකීම් පාදක කර ගනිමින් පොතක් සම්පාදනය කිරීමට මෙන්ම , ශ්‍රී ලංකාව ලෝක කදු නගින්නන්ගේ සංචාරක ගමනාන්තයක් ලෙස ප්‍රවර්ධනය කිරීමට බලාපොරොත්තු වන බව දිවයිනට පැමිණි පසු කටුනායක ගුවන් තොටුපොළේ දී පැවසීය.
(ටී.කේ.ජී.කපිල – කටුනායක)
