වැඩි කාලයක් තිස්සේ නඩු විභාගයකින් තොරව බන්ධනාගාරගත කර සිටින ඉන්දියානු මානව හිමිකම් ක්‍රියාකාරිකයෙකු වන උමාර් කාලිඩ් (Umar Khalid) වෙත, අයර්ලන්තය පදනම් කරගත් Front Line Defenders සංවිධානය විසින් පිරිනමනු ලබන 2026 අවදානමට ලක්වූ මානව හිමිකම් ආරක්ෂකයින් උදෙසා වන සම්මානය (Award for Human Rights Defenders at Risk) හිමිව තිබේ.
ඩබ්ලින් නුවර පැවැති සම්මාන උළෙලේදී මෙම සම්මානය ප්‍රකාශයට පත් කළ අතර, කාලිඩ් තවදුරටත් බන්ධනාගාරගතව පසුවන බැවින් ඔහුට ඊට සහභාගී වීමට නොහැකි විය.
2020 වසරේදී ඊසානදිග දිල්ලිහි ඇති වූ ගැටුම් පිටුපස පැවැති කුමන්ත්‍රණයකට සම්බන්ධ බවට චෝදනා කරමින් 2020 සැප්තැම්බර් 13 වන දින උමාර් කාලිඩ් අත්අඩංගුවට ගන්නා ලදී. නඩු විභාගයකින් තොරව ඔහු වසර හයකට වැඩි කාලයක් බන්ධනාගාරගත කර තැබීම සම්බන්ධයෙන් අදහස් දක්වමින් Front Line Defenders සංවිධානය සඳහන් කළේ, මානව හිමිකම් ආරක්ෂකයින්, මාධ්‍යවේදීන් සහ ශිෂ්‍ය ක්‍රියාකාරිකයින් මර්දනය කිරීම සඳහා ත්‍රස්ත විරෝධී පනත් සහ දැඩි ඇප කොන්දේසි අවභාවිත කරන බවට මෙය හොඳම නිදසුනක් බවයි. එමෙන්ම 2020 වසරේදී අමරාවති (Amravati) හිදී ඔහු කළ කතාව ප්‍රචණ්ඩත්වය ඇවිස්සීමක් ලෙස සැලකිය නොහැකි බවද එම සංවිධානය වැඩිදුරටත් අවධාරණය කළේය.
උමාර් කාලිඩ් සහ ෂර්ජීල් ඉමාම් (Sharjeel Imam) ඇතුළු තවත් පිරිසකට එරෙහිව නීති විරෝධී කටයුතු වැළැක්වීමේ පනත (UAPA) ඇතුළු පනත් කිහිපයක් යටතේ චෝදනා එල්ල වී ඇත. අධිකරණය විසින් ඔවුන්ගේ ඇප ඉල්ලීම් වාර ගණනාවක් ප්‍රතික්ෂේප කර ඇති අතර, පසුගිය සැප්තැම්බර් 30 වන දිනද දිල්ලි මහාධිකරණය විසින් කාලිඩ් සහ ඉමාම්ගේ ඇප ඉල්ලීම් නැවතත් ප්‍රතික්ෂේප කරනු ලැබීය.