ආගමික සහජීවනය සහ අන්යෝන්ය අවබෝධය ශක්තිමත් කිරීමේ අරමුණින්, වාරියපොල ශ්රී සුමංගල ජාතික පාසලේ 10 වන ශ්රේණියේ අධ්යාපනය ලබන සිංහල සිසු සිසුවියන් පිරිසක්, නියෝජ්ය විදුහල්පතිවරයා සහ ගුරුවරුන්, කුලියාපිටිය බණ්ඩාර කොස්ත්ත මුස්ලිම් මහා විද්යාලයේ සිසු සිසුවියන් සහ ගුරුවරුන් සමඟ එක්ව ‘මන්බාඋල් හෛරාත් ජුම්මා මස්ජිඩ්’ පල්ලිය වෙත විශේෂ සංචාරයක නිරත වූහ.
පසුගිය 2026 නොවැම්බර් 06 වන දින උදේ 8.30 සිට පස්වරු 4.00 දක්වා මෙම වැඩසටහන ඉතා සාර්ථක අයුරින් පැවැත්විණි.
ඉස්ලාම් දහම, මුස්ලිම් ප්රජාවගේ ආගමික වතාවත් සහ සංස්කෘතික වටිනාකම් පිළිබඳ ප්රායෝගික අවබෝධයක් සිසුන් අතර ඇති කිරීම මෙම වැඩසටහනේ ප්රධාන අරමුණ විය. මෙහිදී, කලිමාව පිළිබඳ පැහැදිලි කිරීමක් සමඟ ඉස්ලාමයේ මූලික කුළුණු පහ සහ ඒවායේ වැදගත්කම, දෛනික පස්වේල යාඥාව (සලාත්) සහ එහි ක්රියාකාරී පිළිවෙත්, සකාත් (දානය), උපවාසය (සව්ම්) සහ හජ් වන්දනාව යන බැඳීම් පිළිබඳව දැනුවත් කිරීම් සිදු කෙරිණි.
මව්පියන් සහ වැඩිහිටියන් ඇසුරු කළ යුතු සහ ගරු කළ යුතු ආකාරය, අසල්වැසියන් සමඟ හොඳ සබඳතා පැවැත්වීම, රෝගීන්ට සහ දිළිඳුන්ට උදව් කිරීම මෙන්ම පවුල් සබඳතා පවත්වාගෙන යා යුතු ක්රමවේද පිළිබඳව ද කරුණු සාකච්ඡා විය.
ජානාසා (මළසිරුරු) භූමදාන කිරීමේ ක්රියාපටිපාටිය පිළිබඳ ප්රායෝගික පැහැදිලි කිරීමක් සිදු කෙරුණු අතර, සිසුන්ට ජුම්මා කුත්බා දේශනයට සහභාගී වී එය ශ්රවණය කිරීමට අවස්ථාව ලබා දෙන ලදී. තවද, පල්ලියේ විවිධ කොටස් සහ ඒවායේ භාවිතය පිළිබඳ හැඳින්වීමක් මෙන්ම පරිසර ආරක්ෂාව අවධාරණය කරමින් රුක් රෝපණ වැඩසටහනක් ද මෙම වැඩසටහනේ විශේෂාංග අතර විය.
සහභාගී වූ සිසුන්ට සහ අමුත්තන්ට කෙටි ආහාර සහ දිවා ආහාරය ලබා දුන් අතර සිසුන් වෙත තිළිණ ද ප්රදානය කෙරිණි. මීට අමතරව, පැමිණි පාසල වෙනුවෙන් පල්ලි පරිපාලනය විසින් විශේෂ ස්මාරක තිළිණයක් ද ප්රදානය කරන ලදී. මෙම වැඩසටහන සම්බන්ධයෙන් සිසුන්ගේ සහ ගුරුවරුන්ගේ අදහස් ද විමසන ලදී.
මෙවැනි නිර්මාණශීලී වැඩසටහන් හරහා විවිධ ආගම්වලට අයත් ජනතාව අතර ඇති පරතරය අඩු කර ගනිමින්, එකිනෙකාගේ ආගමික විශ්වාසයන්ට ගරු කිරීමේ ගුණාංගය, සහෝදරත්වය, මිත්රත්වය සහ ජාතික එකමුතුකම ශක්තිමත් ලෙස වර්ධනය කර ගත හැකි බව මෙම වැඩසටහන මඟින් මනාව තහවුරු කර ඇත.
මෙම වැඩසටහන සඳහා උනන්දුවෙන් සහභාගී වූ සියලුම සිසු සිසුවියන්ට, ගෞරවනීය ගුරු මණ්ඩලයට සහ මෙම වැඩසටහනේ සාර්ථකත්වය වෙනුවෙන් කැප වූ සැමට පල්ලි පරිපාලනය විසින් සිය හෘදයාංගම ස්තූතිය පුද කරනු ලැබේ. සිසුන්ට ඉස්ලාම් දහම පිළිබඳ පැහැදිලි දැනුමක් ලබා ගැනීමටත්, ප්රජාවන් අතර ආදරයෙන් හා මිත්රත්වයෙන් කාලය ගත කිරීමටත් මෙය ඉතා වටිනා අවස්ථාවක් විය.


