ෆේස්බුක් ඇතුළු ප්රමුඛ සමාජ මාධ්ය ජාලයන්හි විවිධ සමූහ (Groups) සාදා ගනිමින්, කාන්තාවන්ගේ සහ ළමුන්ගේ පෞද්ගලික ඡායාරූප මෙන්ම අසභ්ය දර්ශන මුදලට අලෙවි කිරීමේ සහ මිලදී ගැනීමේ මහා පරිමාණ සංවිධානාත්මක ජාවාරමක් අනාවරණය වී ඇති බව ළමා හා කාන්තා කටයුතු අමාත්යාංශය පවසයි.
මෙම තත්ත්වය හමුවේ කාන්තාවන් සහ ළමයින් අපරාධවලට ගොදුරු වීම වැළැක්වීම සඳහා අමාත්යාංශයේ පූර්ණ අවධානය යොමු කර ඇති අතර, ඊට එරෙහිව කඩිනමින් මැදිහත් වීමට පියවර ගෙන තිබේ.
මූලික සොයාගැනීම් වැඩිදුර පරීක්ෂණ සඳහා ශ්රී ලංකා පොලිස් ළමා හා කාන්තා කාර්යාංශය සහ පරිගණක අපරාධ විමර්ශන කොට්ඨාසය (CCID) වෙත යොමු කර ඇත.
ව්යාජ ගිණුම් (Fake accounts) මගින් ඇතැම් පුද්ගලයන් සිය සමීපතමයන්ගේ සහ පවුලේම සාමාජිකාවන්ගේ ඡායාරූප හා වීඩියෝ මෙලෙස අලෙවි කිරීමට උත්සාහ කර ඇති බව හෙළි වී තිබේ.
අදාළ නීති විරෝධී සමූහ අතුරින් බහුතරයක් විදේශයන්හි සිට මෙහෙයවනු ලබන බවට හඳුනාගෙන ඇත.
දෙමාපියන්ට සහ මහජනතාවට කෙරෙන දැනුම්දීම
තමන්ගේම නිවස තුළ පවා පවුලේ කාන්තාවන් සහ ළමුන් මෙවැනි අනාරක්ෂිත තත්ත්වයන්ට ගොදුරු වීමේ දැඩි අවදානමක් පවතී. එම නිසා:
-
දැඩි අවධානය: දෙමාපියන් සිය දරුවන්ගේ සමාජ මාධ්ය භාවිතය සහ ඔවුන් ඇසුරු කරන පිරිස් පිළිබඳ නිරන්තර අවධානයෙන් පසුවිය යුතුය.
-
මනෝ සමාජයීය උපදේශනය: යම් හෙයකින් පවුලේ අයෙකු මෙවැනි ජාවාරමක ගොදුරක් බවට පත්ව ඇත්නම් හෝ මෙයට ඇබ්බැහි වී ඇත්නම්, ඔවුන් වහාම උපදේශන සේවා වෙත යොමු කිරීමට කටයුතු කරන්න.
මෙවැනි අපරාධවලින් ආරක්ෂා වීමට, නෛතික උපදෙස් සහ සහාය ලබාගැනීම වෙනුවෙන් ළමා හා කාන්තා කටයුතු අමාත්යාංශය විසින් පහත සඳහන් ගාස්තු රහිත උපකාරක අංක හඳුන්වා දී ඇත:
-
1938 (කාන්තා හදිසි ඇමතුම් අංකය)
-
1929 (ජාතික ළමා ආරක්ෂක අධිකාරිය)
මේ අතර, මෙම බරපතල තත්ත්වය පිළිබඳව සමාජ මාධ්ය පරිශීලකයින් දැනුවත් කිරීම සඳහා සමාජ ක්රියාකාරීන් විසින් ලිපි සහ වීඩියෝ පට අන්තර්ජාලයට එක්කරමින් පුළුල් දැනුවත් කිරීමේ ප්රචාරණයක් ද ආරම්භ කර තිබේ.