රජය විසින් යෝජනා කර ඇති “රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පතට” (Protection of the State from Terrorism Act – PSTA) එරෙහිව ඊයේ (ඔක්තෝබර් 13) කොළඹ ජනාධිපති ලේකම් කාර්යාලය ඉදිරිපිටදී විරෝධතාවක් පැවැත්විණි.
විරෝධතාකරුවන් ඉල්ලා සිටියේ දැනට පවතින 1979 අංක 48 දරන ත්‍රස්තවාදය වැළැක්වීමේ (තාලික ප්‍රතිපාදන) පනත (PTA) සම්පූර්ණයෙන්ම අහෝසි කරන ලෙසත්, අලුතින් ඉදිරිපත් කර ඇති PSTA පනත් කෙටුම්පත වහාම ඉවත් කරගන්නා ලෙසත්ය.
අධිකරණ අමාත්‍ය හර්ෂණ නානායක්කාර මහතා විසින් ඔක්තෝබර් 06 වන දින මෙම පනත් කෙටුම්පත පාර්ලිමේන්තුවට ඉදිරිපත් කිරීමෙන් අනතුරුව මෙම විරෝධතාව පැවැත්විණි. යෝජිත නීතිය මගින් පැරණි ත්‍රස්තවාදය වැළැක්වීමේ පනත අහෝසි කර, ඒ වෙනුවට නව නීතිමය රාමුවක් ආදේශ කිරීමට නියමිතය.
මෙම නව පනත් කෙටුම්පත මගින් ත්‍රස්තවාදය සහ ඊට අදාළ වැරදි ආවරණය වන පරිදි නව නීති පද්ධතියක් හඳුන්වා දෙන අතර, සැකකරුවන් හඳුනා ගැනීම, අත්අඩංගුවට ගැනීම, රඳවා තබා ගැනීම, විමර්ශනය කිරීම, නඩු පැවරීම සහ දඬුවම් පැමිණවීම සඳහා වන නව ප්‍රතිපාදන ඊට ඇතුළත් වේ.
ශ්‍රී ලංකාවේ ජාතික ආරක්ෂාව තහවුරු කිරීම, රට තුළ හෝ විදේශයන්හි සිදුවන ත්‍රස්තවාදී ක්‍රියාවලින් මහජනතාව ආරක්ෂා කිරීම සහ විදේශයන්හි ත්‍රස්තවාදී කටයුතු සංවිධානය කිරීම සඳහා ශ්‍රී ලාංකේය භූමිය භාවිත කිරීම වැළැක්වීම මෙම පනතේ ප්‍රධාන අරමුණු ලෙස රජය පෙන්වා දෙයි.
කෙසේ වෙතත්, යෝජිත නීතියට එල්ල වන විරෝධතා හමුවේ එය ඉවත් කරගන්නා ලෙස විවිධ පාර්ශ්වයන්ගෙන් බලපෑම් එල්ල වෙමින් පවතින අතර, ශ්‍රී ලංකාවේ ත්‍රස්තවාදයට එරෙහි නීතිමය රාමුව පිළිබඳ සංවාදයේදී මෙම පනත් කෙටුම්පතේ ඉදිරි පාර්ලිමේන්තු ක්‍රියාවලිය තීරණාත්මක මාතෘකාවක් බවට පත්ව ඇත.