ඉරාන ඉලක්ක වෙත අමෙරිකාව එල්ල කළ නවතම ප්රහාර මාලාවට ප්රතිචාර වශයෙන්, මැදපෙරදිග පුරා පිහිටි අමෙරිකානු හමුදා කඳවුරු සහ පහසුකම් ඉලක්ක කරගනිමින් දැවැන්ත මිසයිල සහ ඩ්රෝන ප්රහාර මාලාවක් එල්ල කළ බව ඉරානය පවසයි. දෙරට අතර හමුදාමය ගැටුම් තීව්ර වීමත් සමඟ කලාපය පුරා දැඩි යුධ භීතියක් නිර්මාණය වී තිබේ.
ඉරාන ඉස්ලාමීය විප්ලවීය ආරක්ෂක බලකාය (IRGC) ප්රකාශ කළේ ජෝර්දානයේ පිහිටි අමෙරිකානු මැරීන් හමුදා කඳවුරක් ඇතුළු හමුදාමය ස්ථාන වෙත බැලස්ටික් මිසයිල ප්රහාර එල්ල කළ බවයි. මීට අමතරව ඉරාකය, බහරේනය සහ කුවේතය යන රටවල පිහිටි අමෙරිකානු ඉලක්ක වෙත ද ප්රහාර එල්ල වූ බව වාර්තා වේ.
ජෝර්දාන ගුවන් ආරක්ෂක බලකාය සඳහන් කළේ ඉරානයේ සිට පැමිණි බැලස්ටික් මිසයිල 13 න් 10 ක් සාර්ථකව අහසේදීම විනාශ කළ අතර, ඉතිරි මිසයිල 3 ජනශූන්ය ප්රදේශවලට පතිත වූ බවයි. එම ප්රහාරවලින් ජීවිත හානි කිසිවක් සිදු වී නොමැත.
මෙම ප්රහාරවලින් අමෙරිකානු සෙබළුන් මියගිය බවට ඉරානය හිමිකම් කීවද, අමෙරිකානු බලධාරීන් පැවසුවේ මූලික පරීක්ෂණවලට අනුව අමෙරිකානු සෙබළුන්ට කිසිදු හානියක් සිදු වී නොමැති බවයි. බහරේනය සහ කුවේතය ද ඉරාන ඩ්රෝන සහ මිසයිල ප්රහාර සාර්ථකව මැඩපැවැත්වීමට කටයුතු කර තිබේ.
හෝමුස් සමුද්ර සන්ධියේ (Strait of Hormuz) වෙළඳ නෞකාවලට සහ අමෙරිකානු සෙබළුන්ට ප්රහාර එල්ල කිරීමට දැරූ උත්සාහයන්ට පිළිතුරු ලෙස, දකුණු ඉරානයේ පිහිටි IRGC රාඩාර්, ගුවන් ආරක්ෂක පද්ධති සහ සන්නිවේදන යටිතල පහසුකම් ඉලක්ක කර ප්රහාර එල්ල කළ බව අමෙරිකානු මධ්යම බලකාය (CENTCOM) ප්රකාශ කළේය.
මේ අතර, දකුණු ඉරානයේ සිරික (Sirik) ප්රදේශයේ මඟුල් ගෙයක් පැවැත්වුණු නවාසික ගොඩනැගිල්ලකට අමෙරිකානු ප්රහාරයක් එල්ල වූ බව ඉරාන බලධාරීන් චෝදනා කරයි. එම ප්රහාරයෙන් කුඩා ළමයෙකු ඇතුළු 5 දෙනෙකු මියගොස් 50 කට වැඩි පිරිසක් තුවාල ලබා ඇති බව ඉරාන රතු කුරුස සංගමය තහවුරු කළේය.
අමෙරිකානු ජනාධිපති ඩොනල්ඩ් ට්රම්ප් මීට පෙර ඉරානයට අවවාද කර තිබුණේ, අමෙරිකානු ප්රහාර හමුවේ ඉරානය යම් ප්රතිප්රහාරයක් එල්ල කළහොත් ඊට වඩා ප්රබල ප්රහාරයකට මුහුණ දීමට සිදුවනු ඇති බවයි.