පාරිභෝගිකයින්ගේ පූර්ව අනුමැතිය ලබාගැනීමකින් තොරව සිදුකරනු ලබන වෙළෙඳ ප්රචාරණ අලෙවිකරණ (Telemarketing) දුරකථන ඇමතුම් රට පුරා තහනම් කිරීමට ප්රංශ රජය පියවර ගෙන තිබේ.
2026 අගෝස්තු 11 වන දින සිට බලපැවැත්වෙන පරිදි මෙම නව නීතිරීති හඳුන්වා දී ඇත. මීට පෙර පැවැති ක්රමවේදය යටතේ අනවශ්ය ඇමතුම් වැළැක්වීම සඳහා පාරිභෝගිකයින් විසින්ම අදාළ පද්ධතිවල ලියාපදිංචි වී ඉවත් විය යුතු (opt-out) වූ අතර, නව රාමුව යටතේ ඕනෑම වෙළෙඳ ඇමතුමක් ලබාදීමට පෙර පාරිභෝගිකයාගේ පූර්ව එකඟතාව ලබාගැනීම (opt-in) අනිවාර්ය වේ.
නව නීතිරීතිවලට අනුව, අලෙවිකරණ ඇමතුම් ලබාදීමට පෙර අදාළ පාරිභෝගිකයා ඊට කැමැත්ත පළකර ඇති බව තහවුරු කිරීමේ වගකීම සමාගම් සතුවෙයි. කෙසේ වෙතත්, ව්යාපාරයක් සහ පාරිභෝගිකයෙකු අතර දැනට පවතින ගිවිසුමකට අදාළව සිදුකරනු ලබන ඇතැම් ඇමතුම් සඳහා සීමිත සහනයක් හිමිවේ.
පාරිභෝගික ආරක්ෂණය ශක්තිමත් කිරීම, අනවශ්ය ඇමතුම් මඟින් සිදුවන කරදරකාරී තත්ත්වයන් අවම කිරීම සහ දුරකථන මාර්ගයෙන් සිදුවන මූල්ය වංචා මර්දනය කිරීම මෙම තීරණයේ ප්රධාන අරමුණයි.
මෙම නීතිරීති උල්ලංඝනය කරන පුද්ගලයින් සඳහා යුරෝ 75,000 දක්වාද, ව්යාපාරික ආයතන සහ සමාගම් සඳහා යුරෝ 375,000 දක්වාද වන දැඩි දඩ මුදල් පැනවීමට ප්රතිපාදන සලසා ඇත. අනවශ්ය දුරකථන ඇමතුම් පිළිබඳව නැඟෙන පාරිභෝගික චෝදනාවලට විසඳුම් දෙමින්, පාරිභෝගික එකඟතාව මත පදනම් වූ දැඩි නීතිරීති බලාත්මක කළ ලෝකයේ ප්රමුඛ රටවල් අතරට ප්රංශයද මෙලෙස එක්වෙයි.