කොළඹ සහිරා විද්‍යාලයීය 2026 ඉංග්‍රීසි දිනය අභිමානවත් ලෙස පැවැත්වේ

0
17

කොළඹ සහිරා විද්‍යාලයීය ඉංග්‍රීසි සාහිත්‍ය සංගමය විසින් සංවිධානය කරන ලද “2026 ඉංග්‍රීසි දිනය” (English Day 2026), විදුහල්පති ට්‍රිස්වි මරික්කාර් මහතාගේ ප්‍රධානත්වයෙන් පසුගියදා විද්‍යාලයීය ගෆූර් ශාලාවේදී පැවැත්විණි.

ඉංග්‍රීසි සාහිත්‍ය සංගමයේ භාර ආචාරිනී ෂෙසා අලිමාන් මහත්මිය විසින් උත්සවයේ පිළිගැනීමේ කතාව සිදු කළ අතර, ප්‍රධාන ආරාධිත අමුත්තා ලෙස ‘LeadCom’ ආයතනයේ නිර්මාතෘ සහ ප්‍රධාන විධායක නිලධාරී මෙන්ම 2024 ලෝක ප්‍රසිද්ධ කථික ශූරතාවලියේ අටවන ස්ථානය දිනාගත් රවී උඩුවෙල මහතා සහභාගී විය. සිය පාසල් දිවියේ මතකයන් සහ සාර්ථක ප්‍රසිද්ධ කථිකයෙකු බවට පත්වීමේ ගමන් මග පිළිබඳ අදහස් බෙදාගත් ඒ මහතා, සන්නිවේදන කුසලතා වර්ධනය කර ගනිමින් ආත්ම විශ්වාසයෙන් යුතුව තම අරමුණු කරා යෑමට සිසුන් දිරිමත් කළේය.

මෙහිදී සභාව ඇමතූ විදුහල්පති ට්‍රිස්වි මරික්කාර් මහතා භාෂාවේ ඇති බලය පෙන්වා දුන් අතර, සාර්ථකත්වය සඳහා ඵලදායී සන්නිවේදනය අත්‍යවශ්‍ය බව අවධාරණය කළේය. වර්තමාන ලෝකයේ පවතින ප්‍රධානතම අභියෝගයක් වන්නේ සන්නිවේදනය බව සඳහන් කළ ඒ මහතා, ජීවිතයේ සෑම අංශයකදීම එහි වැදගත්කම හඳුනා ගන්නා ලෙස සිසුන්ගෙන් ඉල්ලා සිටියේය. තවද, ත්‍යාගලාභී සිසුන්ට සුබ පැතූ විදුහල්පතිවරයා, ගුරු භවතුන්ගේ කැපවීම සහ උනන්දුව පිළිබඳව සිය කෘතඥතාව පළ කළේය.

ප්‍රසිද්ධ කථික, විවාද, නාට්‍ය, ගායනා, සංවාද මණ්ඩප සහ කවි ගායනා ඇතුළු විවිධ සාහිත්‍ය ක්‍රියාකාරකම් හරහා සිසුන්ට තම දක්ෂතා එළිදැක්වීමට මෙම උත්සවය කදිම වේදිකාවක් විය. ‘Edexcel’ කෙටි සංවාදයක්, ‘රොබින් හුඩ්’ නාට්‍යය, ඉංග්‍රීසි සහ සිංහල මාධ්‍ය ගායනා මෙන්ම කවි ගායනා ද මෙම වැඩසටහනට ඇතුළත් විය. මීට අමතරව, පාසල්, කොට්ඨාස, කලාප සහ පළාත් මට්ටමින් විවිධ ක්ෂේත්‍රයන්හි දක්ෂතා දැක්වූ සිසුන්ගේ ජයග්‍රහණ ඇගයීමට ලක් කිරීම ද මෙහිදී සිදු කෙරිණි.

ඉංග්‍රීසි සාහිත්‍ය සංගමයේ 2025/2026 නිලධාරී මණ්ඩලයේ ධුර කාලය අවසන් වීම සනිටුහන් කරමින් නව නිලධාරී මණ්ඩලයට වගකීම් පැවරීම සහ නික්ම යන සාමාජිකයින්ගේ සේවය ඇගයීම ද උත්සවයේ තවත් සුවිශේෂී අංගයක් විය. උත්සවය අවසානයේ විදුහල්පතිවරයා විසින් ප්‍රධාන ආරාධිත අමුත්තා වූ රවී උඩුවෙල මහතා වෙත සමරු තිළිණයක් ද පිරිනමන ලදී.

මෙම අවස්ථාවට විෂය සමගාමී ක්‍රියාකාරකම් අංශ ප්‍රධානී ෂිහ්නාස් බදුර්දීන් මහත්මිය, උප විදුහල්පතිනි සීනත් ඉස්මයිල් මහත්මිය, ප්‍රාථමික අංශ ප්‍රධානී හස්නා ඉෆ්ලාල් මහත්මිය, පාලක සභාවේ විෂය සමගාමී ක්‍රියාකාරකම් කමිටුවේ සභාපති එම්.ආර්.එම්. නිම්නාස් මහතා ඇතුළු ආචාර්ය මණ්ඩලය සහ සිසු දරුවන් පිරිසක් එක්ව සිටියහ. භාෂාව, නිර්මාණශීලීත්වය සහ සිසු ජයග්‍රහණ සැමරූ 2026 ඉංග්‍රීසි දිනය, සිසුන්ගේ ආත්ම විශ්වාසය, සන්නිවේදන කුසලතා සහ ඉංග්‍රීසි සාහිත්‍ය රසවින්දනය වර්ධනය කිරීමට මහඟු පිටිවහලක් විය.

LEAVE A REPLY

Please enter your comment!
Please enter your name here