පවන් රත්නායක, දසුන් ශානක, ජනිත් ලියනගේ සහ අවිශ්ක ප්‍රනාන්දු යන ක්‍රීඩකයන්ගේ විශිෂ්ට දස්කම් හේතුවෙන් ශ්‍රී ලංකා කණ්ඩායම වාර්තා කළ මෙම ඓතිහාසික ජයග්‍රහණය ඉහළින්ම සැමරිය යුතු බව හිටපු ශ්‍රී ලංකා ක්‍රිකට් නායක කුමාර් සංගක්කාර පවසයි.
සිය ‘X’ ගිණුමේ සටහනක් තබමින් ඔහු සඳහන් කර ඇත්තේ, ජයග්‍රහණයේ සතුට විඳින අතරම ඉදිරි අභියෝග ජය ගැනීම සඳහා කණ්ඩායමේ අවධානය අඛණ්ඩව රඳවා ගත යුතු බවය.
විශේෂයෙන්ම ලබන වසරේ (2027) ඔක්තෝබර් මාසයේදී දකුණු අප්‍රිකාවේ පැවැත්වීමට නියමිත ලෝක කුසලාන ක්‍රිකට් තරගාවලිය ඉලක්ක කර ගනිමින් කණ්ඩායම තවදුරටත් ශක්තිමත් කිරීමේ දීර්ඝකාලීන සැලසුම් ක්‍රියාත්මක කිරීමේ වගකීම ක්‍රිකට් බලධාරීන් සතු බව ඔහු පෙන්වා දෙයි.
රාවල්පින්ඩිහිදී පැවැති පාකිස්තාන තුන්කොන් එක්දින ක්‍රිකට් තරගාවලියේදී එංගලන්තය ලබාදුන් ලකුණු 430ක අති දැවැන්ත ඉලක්කය පන්දුවාර 49.5කදී හඹා ගොස් කඩුලු 2ක සටන්කාමී ජයක් ලැබීමට ශ්‍රී ලංකා පිතිකරුවෝ සමත් වූහ.
මෙම අමතක නොවන විශිෂ්ට ජයග්‍රහණය පදනම් කරගනිමින් කණ්ඩායම ඉදිරියටත් ඉහළම මට්ටමක පවත්වා ගැනීමට ක්‍රමානුකූල වැඩපිළිවෙලක් සැකසීම අත්‍යවශ්‍ය බව සංගක්කාර වැඩිදුරටත් අවධාරණය කරයි.