ඉන්දීය සමකාලීන කලාවට ජාත්‍යන්තර මට්ටමේ දැවැන්ත පිළිගැනීමක් සහ අවධානයක් දිනාදීමට පුරෝගාමී දායකත්වයක් සැපයූ, නවදිල්ලියේ ප්‍රසිද්ධ ‘Nature Morte’ කලාගාරයේ නිර්මාතෘ පීටර් නාගි (Peter Nagy) වයස අවුරුදු 67දී ජීවිතක්ෂයට පත්ව තිබේ.
දිගුකාලීන අසනීප තත්ත්වයකින් පසු ඔහු අභාවප්‍රාප්ත වූ බව අදාළ කලාගාරය අඟහරුවාදා රාත්‍රියේ නිකුත් කළ නිවේදනයක දැක්වේ. අමෙරිකාවේ කනෙක්ටිකට් ප්‍රාන්තයේ උපත ලද පීටර් නාගි, 1982 වසරේදී කලාකරුවෙකු වන ඇලන් බ්ලෙචර් සමඟ එක්ව නිව්යෝර්ක් නගරයේ ‘ඊස්ට් විලේජ්’ ප්‍රදේශයේ ‘Nature Morte’ කලාගාරය ඇරඹීය.
පසුව ඉන්දියානු සමකාලීන කලාව ජාත්‍යන්තර වේදිකාවට හඳුන්වා දීමේ පෙරගමන්කරුවෙකු වූ ඔහු, සුබෝද් ගුප්තා සහ භාරතී ඛේර් වැනි ප්‍රකට කලාකරුවන්ගේ නිර්මාණ ලෝකයාගේ අවධානයට ලක් කිරීමට විශාල මෙහෙයක් ඉටු කළේය.
පීටර් නාගිගේ වියෝවෙන් පසු කලාගාරය වසා නොදැමීමට තීරණය කර ඇති බව එහි පාලනාධිකාරිය පවසයි. ශෝකය සැමරීම වෙනුවට කලාකරුවන්ගේ නිර්මාණ ප්‍රදර්ශනය කිරීම අඛණ්ඩව ඉදිරියට ගෙන යාම ඔහුගේ අපේක්ෂාව වූ බව එම නිවේදනයේ වැඩිදුරටත් සඳහන් වේ.