මරණ දණ්ඩනයට මුහුණ දී සිටින ශ්රී ලාංකික පුරවැසි සිවරාසා අනෝජන් හට සමාව ලබා දෙන ලෙසත්, මානුෂීය පදනම මත ඔහුගේ ජීවිතය බේරා ගන්නා ලෙසත් ශ්රී ලංකාවේ මාධ්ය සංවිධාන පහක් එක්ව සෞදි අරාබි නායකත්වයෙන් ඉල්ලා සිටී.
සැප්තැම්බර් 22 වන දින නිකුත් කළ ඒකාබද්ධ ප්රකාශයක් මගින් මෙම සංවිධාන, ‘ශුද්ධ වූ මුස්ලිම් පල්ලි දෙකෙහි භාරකරු’ (Custodian of the Two Holy Mosques) සහ සෞදි නායකත්වය වෙත ඉල්ලා සිටියේ, අනෝජන්ගේ නඩුව සම්බන්ධයෙන් ඉතිරිව ඇති අධිකරණමය ක්රියාමාර්ග ක්රියාත්මක වන අතරතුර දයාව සහ අනුකම්පාව පළ කරන ලෙසයි.
සෞදි අරාබියේ අධිකරණ ක්රියාවලියට තමන් පූර්ණ ගෞරවය පළ කරන බව පවසන එම සංවිධාන, මෙම නඩුවට වැදගත් මානුෂීය පැතිකඩක් ද ඇති බව අවධාරණය කළහ.
“සිංහල, දෙමළ සහ මුස්ලිම් යන ශ්රී ලංකාවේ විවිධ ප්රජාවන් නියෝජනය කරන මාධ්ය සංවිධාන ලෙස, සියලු ආගම්වලට ගරු කිරීම, ආගමික සහජීවනය, වගකීම් සහගත අදහස් ප්රකාශ කිරීම සහ සාමකාමීව එකට ජීවත් වීම යන කරුණු වෙනුවෙන් අපගේ පොදු කැපවීම අපි තහවුරු කරමු,” යනුවෙන් එම ප්රකාශයේ සඳහන් විය.
එසේම ඉස්ලාමීය දහම තුළ අන්තර්ගත දයාව, සමාව දීම, පසුතැවිල්ල සහ අනුකම්පාව වැනි වටිනාකම් පිළිබඳව අවධාරණය කළ ඔවුහු, ඉහළම මට්ටමේ රාජ්යතාන්ත්රික මැදිහත්වීම් අඛණ්ඩව සිදු කරන ලෙස ශ්රී ලංකා රජයෙන් ඉල්ලා සිටියහ.
මෙම නඩුවට මානුෂීය විසඳුමක් ලබා ගැනීම සඳහා පවතින සියලුම නීතිමය සහ මානුෂීය ක්රියාමාර්ග අනුගමනය කරන ලෙස එම සංවිධාන රජයෙන් ඉල්ලා සිටියහ.
අනෝජන්ගේ නඩුව පිළිබඳව සමීපව නිරීක්ෂණය කරන බවත්, රාජ්යතාන්ත්රික මාර්ග ඔස්සේ සෞදි බලධාරීන් සමඟ සාකච්ඡා පවත්වන බවත් ශ්රී ලංකා විදේශ කටයුතු අමාත්යාංශය තහවුරු කර ඇති බව එම ප්රකාශයේ සඳහන් විය.
සමාව ලබා දීම ශ්රී ලංකාවේ ජනතාවගේ ඉමහත් ඇගයීමට ලක්වනු ඇති බවත්, එමගින් ශ්රී ලංකාව සහ සෞදි අරාබිය අතර පවතින දීර්ඝකාලීන මිත්රත්වය තවදුරටත් ශක්තිමත් කළ හැකි බවත් එම සංවිධාන පහ ප්රකාශ කළහ.
“ශ්රී ලාංකික පුරවැසියෙකුගේ ජීවිතය අවදානමට ලක්ව ඇති මොහොතක, ජීවිතය ආරක්ෂා කිරීමට සහ ඔහුට තම පවුල වෙත ආරක්ෂිතව නැවත පැමිණීමට පහසුකම් සැලසීමට හැකි සෑම උත්සාහයක්ම ගත යුතු බව අපි විශ්වාස කරමු,” යනුවෙන් එම ප්රකාශයේ දැක්වේ.
මෙම ඒකාබද්ධ ඉල්ලීම ‘නිදහස් මාධ්ය ව්යාපාරය’ (Free Media Movement), ‘සවුත් ඒෂියන් විමෙන් ඉන් මීඩියා’ (South Asian Women in Media), ‘ශ්රී ලංකා ක්රියාකාරී මාධ්යවේදීන්ගේ සංගමය’ (Sri Lanka Working Journalists Association), ‘දෙමළ මාධ්ය සන්ධානය’ (Tamil Media Alliance) සහ ‘ශ්රී ලංකා මුස්ලිම් මාධ්ය සංසදය’ (Sri Lanka Muslim Media Forum) යන සංවිධාන විසින් නිකුත් කරන ලදී.
