එක්සත් ජනපදය තම ඉල්ලීම්වලට එකඟ වන්නේ නම්, උපායමාර්ගිකව ඉතා වැදගත් හෝමුස් (Strait of Hormuz) සමුද්‍ර සන්ධියේ ආරක්ෂාව තහවුරු කිරීමට සහ ඉතා කෙටි කාලයක් ඇතුළත රාජ්‍යතාන්ත්‍රික සාකච්ඡා නැවත ආරම්භ කිරීමට හැකි බව ඉරානය ප්‍රකාශ කර ඇත.
තමන් ඉදිරිපත් කරන කොන්දේසි පිළිගැනීම හරහා මෙම ප්‍රධාන නාවික වෙළඳ මාර්ගයේ ආරක්ෂාව නැවත ස්ථාපිත කිරීමටත්, රාජ්‍යතාන්ත්‍රික ක්‍රියාවලිය නැවත ආරම්භ කිරීමටත් මග පාදනු ඇති බව ටෙහෙරාන් පාලනය වැඩිදුරටත් සඳහන් කළේය.
මේ අතර, ඇමරිකානු ජනාධිපති ඩොනල්ඩ් ට්‍රම්ප් තදබල අනතුරු ඇඟවීමක් කරමින් කියා සිටියේ ඉරානයට එරෙහි යුද්ධය “යම් ආකාරයකින් ඉතා ඉක්මනින්” අවසන් වන බවයි. ටෙහෙරානය වොෂින්ටනය සමඟ එකඟතාවකට පැමිණිය යුතු බවත්, එසේ නොමැති නම් වැඩිදුර මිලිටරි ක්‍රියාමාර්ගවලට මුහුණ දීමට සිදුවනු ඇති බවත් ඔහු අවධාරණය කළේය. ඉරානය ගිවිසුමකට පැමිණීමට අසමත් වුවහොත් දැඩි හමුදා ප්‍රහාර එල්ල කරන බවටද ට්‍රම්ප් අනතුරු ඇඟවීය.
මෙම උණුසුම් තත්ත්වය මධ්‍යයේ, හෝමුස් සමුද්‍ර සන්ධියේදී මුහුදු බෝම්බ (sea mines) වල ගැටීමෙන් බොරතෙල් ප්‍රවාහන නෞකා දෙකක ගින්නක් හටගත් බව ඉරානයේ ඉස්ලාමීය විප්ලවීය ආරක්ෂක බලකාය (IRGC) ප්‍රකාශ කර තිබේ. පසුගිය සිකුරාදා කටාර් රාජ්‍යයට අයත් ද්‍රවීකෘත ස්වාභාවික වායු (LNG) ප්‍රවාහන නෞකාවකට එල්ල වූ ප්‍රහාරය ගල්ෆ් කලාපීය රටවල දැඩි දෝෂදර්ශනයට ලක්වීමෙන් අනතුරුව මෙම සිදුවීම වාර්තා විය.
හෝමුස් සමුද්‍ර සන්ධිය නැවත විවෘත කිරීම සඳහා යෝජිත දෙදින සැලැස්ම පිළිබඳව මැදිහත්කරුවන් සමඟ සාකච්ඡා තවදුරටත් ඉදිරියට යන බව ඉරාන විදේශ අමාත්‍ය අබ්බාස් අරාග්චි (Abbas Araghchi) පැවසීය. රාජ්‍යතාන්ත්‍රික විසඳුමකට එළැඹීම සඳහා සහ ගිවිසුමකට පැමිණීම සඳහා එක්සත් ජනපදය ප්‍රමාණවත් කැපවීමක් සහ සූදානමක් පෙන්නුම් කරනු ඇතැයි තමා බලාපොරොත්තු වන බවද ඔහු වැඩිදුරටත් ප්‍රකාශ කළේය.