ගෑස් අපනයනය කරන රටවල සංසදයේ (GECF) 8 වැනි රාජ්‍ය නායක සමුළුවට සහභාගී වීම සඳහා ඉරාන ජනාධිපති මසූඩ් පෙසෙෂ්කියන් මහතා රුසියාව වෙත ළඟා වී ඇති බව ඉරාන රාජ්‍ය විකාශන සේවය වන IRIB පවසයි.
මෙම එක්දින නිල සංචාරයේදී ජනාධිපතිවරයා සමුළුව ඇමතීමට මෙන්ම, ඊට සහභාගී වන අනෙකුත් රටවල නායකයන් සමඟ ද්වීපාර්ශ්වික සාකච්ඡා පැවැත්වීමට අපේක්ෂා කරන බව වාර්තා වේ.
මේ අතර, මොස්කව් නුවරදී ඉරාන ජනාධිපතිවරයා සහ රුසියානු ජනාධිපති ව්ලැදිමීර් පුටින් මහතා අතර විශේෂ හමුවක් ද පැවැත්වීමට නියමිත බව ඉරාන විදේශ අමාත්‍ය අබ්බාස් අරාග්චි සඳහන් කර ඇත. රුසියානු විදේශ අමාත්‍ය සර්ජි ලැව්රොව්ගේ ඉරාන සංචාරයේදී ආරම්භ වූ සාකච්ඡාවල තවත් ඉදිරි පියවරක් ලෙස මෙම රාජ්‍ය නායක හමුව සිදුවන බව ඔහු සිය ඉන්ස්ටග්‍රෑම් ගිණුමේ සටහන් කර තිබේ.
මෙම සාකච්ඡා වලදී දෙරට අතර ද්වීපාර්ශ්වික සහයෝගීතාව මෙන්ම කලාපීය සහ ජාත්‍යන්තර මට්ටමේ තීරණාත්මක කරුණු රැසක් පිළිබඳව විශේෂ අවධානයක් යොමු කෙරෙනු ඇත.
ඉරානය, රුසියාව, කටාර් රාජ්‍යය සහ ඇල්ජීරියාව ඇතුළු ලොව ප්‍රධාන පෙළේ ස්වාභාවික ගෑස් නිෂ්පාදනය කරන රටවල් කිහිපයකින් සමන්විත අන්තර්ජාතික සංවිධානයක් ලෙස ගෑස් අපනයනය කරන රටවල සංසදය (GECF) හැඳින්විය හැකිය.