මීගමුව බන්ධනාගාරය තුළ ඇති වූ දරුණු ගැටුමෙන් බරපතළ තුවාල ලබා කොළඹ ජාතික රෝහලේ දැඩි සත්කාර ඒකකයේ ප්රතිකාර ලබමින් සිටි බන්ධනාගාර නියාමකවරයෙකු අවාසනාවන්ත ලෙස ජීවිතක්ෂයට පත්ව තිබේ. මෙම මරණයත් සමඟ බන්ධනාගාර ගැටුම හේතුවෙන් මියගිය සමස්ත පුද්ගලයින් සංඛ්යාව 28 දක්වා ඉහළ ගොස් ඇත.
පසුගිය 6 වනදා උදෑසන දෙවන වරටත් මීගමුව බන්ධනාගාරය තුළ නොසන්සුන්කාරී තත්ත්වයක් හටගත් අතර, එහිදී රැඳවියන් විසින් එල්ල කළ අමානුෂික ප්රහාර හමුවේ බන්ධනාගාර විශේෂ උපක්රමික ඒකකයේ (STU) නිලධාරීන් සත් දෙනෙකුට (07) මීට පෙර දිවි අහිමි විය.
මෙම සමස්ත සිදුවීමෙන් තුවාල ලැබූ 100කට අධික පිරිසක් මීගමුව මහ රෝහලට ඇතුළත් කෙරුණු අතර, ඉන් දැඩි බරපතළ තත්ත්වයේ පසු වූ 20 දෙනෙකු වැඩිදුර ප්රතිකාර සඳහා කොළඹ ජාතික රෝහල වෙත මාරු කර යැවීමට පියවර ගැනුණි.
මේ අතර, ඝාතනයට ලක්වූ එම වීරෝදාර බන්ධනාගාර නිලධාරීන් සත් දෙනාගේ දේහයන් අවසන් ගෞරව දැක්වීම සඳහා අද (08) උදෑසන වැලිකඩ බන්ධනාගාරය වෙත රැගෙන එනු ලැබීය.
එහිදී ඥාතීන්, හිතමිතුරන් මෙන්ම සහෝදර නිලධාරීන්ගේ සෝ සුසුම් සහ ගෞරවාචාර මධ්යයේ දේහයන් තැන්පත් කර තිබූ අතර, අවසන් ගෞරව දැක්වීමෙන් අනතුරුව අවසන් කටයුතු සඳහා දේහයන් පවුලේ ඥාතීන් වෙත නිල වශයෙන් භාර දීමට කටයුතු කෙරිණි.