NEWSNOW | – ශ්‍රී ලංකාවේ අධිකරණ වලින් ඇප ලබා ගෙන, පසුව මුහුදු මාර්ග ඔස්සේ ඉන්දියාවට පළා ගොස් සිටි ශ්‍රී ලාංකික සැකකරුවන් තිදෙනෙකු , එරට ආරක්ෂක අංශ විසින් අත් අඩංගුවට ගෙන, එම අධිකරණ නියෝග මත ඊයේ (03) සවස එරටින් පිටුවහල් කර කටුනායක ගුවන් තොටුපොළ වෙත එවා තිබුණි.
ඔවුන් අතරින් දෙදෙනෙකු වැලිහේන , කොච්චිකඩේ ප්‍රදේශයේ පදිංචිකරුවෝ වෙති . ඔවුන් දෙදෙනා පුත්තලම මහේස්ත්‍රාත් අධිකරණයේ විභාග වන රුපියල් පන් කෝටි හතලිස් අට ලක්ෂයක් වටිනා දුම්කොළ තොගයක් ලබා ගෙන , මුදල් වංචා කිරීමේ නඩු 08 ක විත්තිකරුවෝ වෙති .
33 හැවිරිදි මාදිවලගේ අසිත සාගර ගුණතිලක සහ 44 හැවිරිදි සිල්පත්වාරිගේ සුමිත් රෝලන් ප්‍රනාන්දු ඔවුන් දෙදෙනා වෙති.
මීට අමතරව වැල්ලප්පලම් , පුදුකුඩිඉරිප්පු ප්‍රදේශයේ පදිංච් 34 හැවිරිදි සෙල්වරාජ් කබිලන් නැමති අය කොඩිකාමම් පොලිස් වසමේ අයිස් මත්ද්‍රව්‍ය ග්‍රෑම් 240 ක් සමග පොලිස් විශේෂ කාර්යයේ නිලධාරීන් විසින් අත් අඩංගුවට ගෙන සිටි පුද්ගලයෙකි .
මොවුන් තිදෙනා පසුගිය මස 27 වන දින මන්නාරමෙන් ඉන්දියාව බලා යන බෝට්ටුවක නැගී මෙරටින් පළා ගොස් තිබූ අතර, එරට ආරක්ෂක අංශ මගින් අත් අඩංගුවට ගෙන බන්ධනාගාරගත කර සිටි අතර , පසුව ට්‍රිචි අධිකරණය මගින් මොවුන් ආපසු මෙරටට පිටුවහල් කිරීම සදහා නියෝග කර තිබුණි .
එසේ පිටුවහල් කළ මොවුන් ඊයේ පස්වරු 05.20 ට ඉන්දියාවේ ට්‍රිචි සිට ශ්‍රී ලන්කන් ගුවන් සේවයේ යූ.එල්.- 134 දරන ගුවන් යානයෙන් කටුනායක ගුවන් තොටුපොළ වෙත එවා තිබුණි.
එසේ කටුනායක ගුවන් තොටුපොළ වෙත පැමිණි මොවුන් තිදෙනා , කටුනායක ගුවන් තොටුපොළේ දී අපරාධ පරීක්ෂණ දෙපාර්තමේන්තු නිලධාරීන් විසින් අත් අඩංගුවට ගෙන ප්‍රකාශ සටහන් කර ගැනීමෙන් පසුව ඊයේ දින රාත්‍රී 10.15 ට කොච්චිකඩේ සැකකරුවන් දෙදෙනා , පුත්තලම විශේෂ අපරාධ විමර්ශන අංශයේ නිලධාරීන් වෙත භාර දීමට පියවර ගෙන තිබුණි.
එසේම පුදුකුඩිඉරිප්පු ප්‍රදේශයේ සැකකරු අද (04) දින මීගමුව මහේස්ත්‍රාත් අධිකරණය වෙත ඉදිරිපත් කර , පොලිස් මත්ද්‍රව්‍ය කාර්යාංශයේ නිලධාරීන් විසින් , රදවා තබා ගෙන ප්‍රශ්ණ කිරීම සදහා අවසර ලබා ගැනීමට නියමිතය.
ටී.කේ.ජී. කපිල -කටුනායක