NEWSNOW | – ඉරානයේ “න්‍යෂ්ටික සහ හමුදා ස්ථාන” යැයි පවසන ස්ථාන වලට ඊශ්‍රායලය ප්‍රහාර දියත් කර ඇත.
මෙම ප්‍රහාර වලදී ඊශ්‍රායලය විප්ලවවාදී ආරක්ෂක ප්‍රධානී ‘හොසේන් සලාමි’ සහ හමුදා පුද්ගලයින් සහ න්‍යෂ්ටික විද්‍යාඥයින් කිහිප දෙනෙකු ඝාතනය කර ඇති අතර ටෙහෙරානයේ සහ වෙනත් තැන්වල පිපිරීම් උත්සන්න වන බව විදෙස් මාධ්‍ය පවසයි.
“ටෙහෙරාන් අගනුවර විවිධ ස්ථානවල ඝෝෂාකාරී පිපිරීම් ඇසෙමින් තිබේ” යනුවෙන් රාජ්‍ය රූපවාහිනිය අද(13) අලුයම වාර්’තා කළේය. ඉරානයේ නිල ප්‍රවෘත්ති ඒජන්සිය වන IRNA, ටෙහෙරාන් නගරය සහ ඒ අවට පිපිරීම් ශබ්ද ඇසුණු බව තහවුරු කළේය.
ඉරාන විදේශ අමාත්‍යාංශය ඊශ්‍රායල ප්‍රහාර හෙළා දකිමින් ඒවා “ජාත්‍යන්තර නීතිය පැහැදිලිව උල්ලංඝනය කිරීමක්” ලෙස හැඳින්වීය. අමාත්‍යාංශය පැවසුවේ ඉරානය “ඊශ්‍රායල පාලන තන්ත්‍රය එහි ආක්‍රමණශීලීත්වයේ ප්‍රතිවිපාකවලට මුහුණ දෙනු ඇති” බවය.
අද(13) අලුයම එල්ල වූ මුල් ප්‍රහාරවලින් මියගිය සලාමි, ඉරානයේ හමුදා නායකත්වයේ ප්‍රධාන චරිතයක් වූ අතර විප්ලවවාදී ආරක්ෂක බලකායේ (IRGC) වඩාත්ම කැපී පෙනෙන අණ දෙන නිලධාරියෙකි.
හමුදා නියෝජ්‍ය අණදෙන නිලධාරී ජෙනරාල් ගෝලාම් අලි රෂීඩ් සහ න්‍යෂ්ටික විද්‍යාඥයින් වන ෆෙරෙයිඩූන් අබ්බාසි සහ මොහොමඩ් මහ්ඩි ද ප්‍රහාරවලින් මිය ගිය බව ඉරාන රාජ්‍ය මාධ්‍ය වාර්’තා කළේය.
“ටෙහෙරාන් අගනුවර විවිධ ස්ථානවල ඝෝෂාකාරී පිපිරීම් ඇසුණි,” රාජ්‍ය රූපවාහිනිය වාර්තා කළ අතර, සිවිල් වැසියන් ඇතුළු බොහෝ දෙනෙක් ප්‍රහාරවලින් මිය ගිය බව පැවසීය.
ඉරානයේ මධ්‍යම පළාතේ ඉස්ෆහාන්හි නටාන්ස් නගරයේ ද පිපිරුම් ඇසුණු අතර එය ප්‍රධාන න්‍යෂ්ටික භූමියක් බව රාජ්‍ය රූපවාහිනිය වැඩිදුරටත් පැවසීය.
ඉස්ෆහාන් පළාතේ “නටාන්ස් යුරේනියම් නිෂ්පාදනය කිරීමේ මධ්‍යස්ථානයේ නව පිපිරීමක් ඇසුණි” යනුවෙන් පැය කිහිපයකට පසු විකාශකයා වාර්’තා කළේ, ඝන කළු දුමාරයක් නැඟී එන ආකාරය පෙන්වමිනි.
