NEWSNOW | – මැතිවරණ රාජකාරි සඳහා යොදවා සිටි පොලිස් නිලධාරියෙකු සහ සිවිල් නිලධාරීන් දෙදෙනෙකු හදිසි රෝගාබාධයක් හේතුවෙන් මිය ගොස් ඇති බව ශ්‍රී ලංකා පොලිසිය පවසයි.
අද(14) පෙරවරුවේ පැවති විශේෂ මාධ්‍ය හමුවකට එක්වෙමින් පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව මහතා කියා සිටියේ අද(14) පෙරවරුවේ විවිධ ප්‍රදේශවල මැතිවරණ රාජකාරියේ නිරතව සිටියදී මෙම නිලධාරීන් රෝගාතුර වී ඇති බවයි.
හෘදයාබාධයක් වැනි ස්වභාවික හේතූන් මත ඔවුන් මිය ගොස් ඇති බවට වාර්’තා වන බවද ඔහු වැඩිදුරටත් පැවසීය.
කෝපායි, උරුම්පිරායි ප්‍රදේශයේ පාසලක සේවයේ යෙදී සිටි 33 හැවිරිදි පොලිස් නිලධාරියෙකු මියගොස් ඇති අතර, ඔහු හෘදයාබාධයක් හේතුවෙන් මිය යන්නට ඇති බවට සැක කෙරේ.
කැස්බෑව ප්‍රදේශයේ සිරි සදහම් භික්‍ෂු ආරාමයේ ඡන්ද මධ්‍යස්ථාන ප්‍රධානියා ලෙස පත්වීම් ලැබූ 48 හැවිරිදි කාන්තාවක් ද රාජකාරියේ යෙදී සිටියදී හදිසියේ රෝගාතුර වීමෙන් මියගොස් තිබේ.
පොලිස් මාධ්‍ය ප්‍රකාශකවරයා පැවසුවේ, පයාගල ප්‍රදේශයේ පදිංචි මෙම කාන්තාව පිළියන්දල රෝහලට ඇතුළත් කිරීමෙන් පසු මියගොස් ඇති බව ය.
කොබෙයිගනේ ප්‍රදේශයේ ඡන්ද මධ්‍යස්ථාන කාර්ය මණ්ඩලයට අනුයුක්තව සේවය කළ 57 හැවිරිදි පුද්ගලයෙකුද මැතිවරණ රාජකාරියේ යෙදී සිටියදී හදිසියේ රෝගාතුර වී මියගොස් ඇති බවයි ඔහු වැඩිදුරටත් කියා සිටියේ.
මෙම නිලධාරීන් තිදෙනාම හෘදයාබාධයකින් මිය යන්නට ඇති බවට සැක කරන අතර, මරණ සම්බන්ධයෙන් පශ්චාත් මරණ පරීක්ෂණ පවත්වන බව නියෝජ්‍ය පොලිස්පති තල්දූව මහතා පැවසීය.