NEWSNOW| – හමාස් නායක යහියා සින්වාර් ගාසා තීරයේදී ඝාතනයට ලක්ව ඇත්ද යන්න පිළිබඳව පරීක්ෂණ පවත්වන බව ඊශ්‍රායල හමුදාව පවසයි.
මේ සම්බන්ධයෙන් හමාස් සංවිධානයෙන් කිසිදු ප්‍රකාශයක් මෙතෙක් සිදුකර නොමැත.
උතුරු ගාසා තීරයේ ජබාලියා හි UNRWA පාසැලේදී ඊශ්‍රායල ප්‍රහාරයෙන් අවම වශයෙන් පලස්තීනුවන් 28 දෙනෙකු මිය ගොස් 160 දෙනෙකු තුවාල ලබා ඇති බව විදෙස් මාධ්‍ය පවසයි.
මේ මාසයේ ගාසා තීරයේදී ඊශ්‍රායල ස්නයිපර් වෙඩික්කරුවෙකුගේ ප්‍රහාරයට ලක්වූ අල් ජසීරා කැමරා ශිල්පී ෆාඩි අල්-වහිඩි කෝමා තත්ත්වයෙන් පසුවන අතර ඔහුට හදිසි වෛද්‍ය ප්‍රතිකාර සඳහා එම ප්‍රදේශයෙන් පිටවීමට ඊශ්‍රායලය තවමත් අවසර දී නොමැත.
නැගෙනහිර ලෙබනනයේ බෙකා ප්‍රදේශයෙන් කොටසක් ඉවත් වන ලෙස ඊශ්‍රායල හමුදා නිවැසියන්ට තර්ජනය කර ඇති අතර ඔවුන් එම ප්‍රදේශය ඉලක්ක කරන බවට අනතුරු අඟවා තිබේ.
ගාසා තීරයේ, 2023 ඔක්තෝබර් 7 වැනිදා සිට ඊශ්‍රායල ප්‍රහාරවලින් අවම වශයෙන් පුද්ගලයන් 42,438ක් මිය ගොස් 99,246ක් තුවාල ලබා ඇත. 2023 ඔක්තෝබර් 7 වැනිදා ඊශ්‍රායලයට එල්ල කළ හමාස් ප්‍රහාරවලින් අවම වශයෙන් පුද්ගලයන් 1,139ක් මිය ගිය අතර 200කට වැඩි පිරිසක් වහල්භාවයට ගෙන ඇත.