ආණ්ඩුක්රම ව්යවස්ථාවේ 22 වැනි සංශෝධන පනත් කෙටුම්පත සම්බන්ධයෙන් මතුව ඇති බරපතළ තත්ත්වය පිළිබඳව ශ්රී ලංකා නීතිඥ සංගමය (BASL) විසින් විශේෂ නිවේදනයක් නිකුත් කරමින් සිය කනස්සල්ල පළ කර තිබේ. අධිකරණ පද්ධතියේ කාර්යක්ෂමතාව වැඩි දියුණු කිරීම සහ නඩු විභාග කඩිනම් කිරීම අරමුණු කරගනිමින් මෙම සංශෝධනය ගෙන එන බව රජය පැවසූවත්, විනිසුරුවරුන්ගේ විශ්රාම වයස දීර්ඝ කිරීම සහ එම අරමුණ අතර පවතින සැබෑ සම්බන්ධය පැහැදිලි නැති බව එම සංගමය පෙන්වා දෙයි.
සියලු විරෝධතා නොතකා රජය මෙම සංශෝධනය තවදුරටත් ඉදිරියට ගෙන යාමට තීරණය කරන්නේ නම්, එය ජනමත විචාරණයකට යොමු කර ජනතාව ලවාම තීරණය කරවීමට කැබිනට් මණ්ඩලය පියවර ගත යුතු බව නීතිඥ සංගමය අවධාරණය කරයි. එමඟින් මෙම සංවේදී කරුණ සම්බන්ධයෙන් ශ්රේෂ්ඨාධිකරණයට තීරණයක් ගැනීමට සිදුවන සංකීර්ණ තත්ත්වය වළක්වා ගත හැකිය. අධිකරණයේ ස්වාධීනත්වය උදෙසා ව්යවස්ථාවෙන් ලබා දී ඇති විශේෂ ආරක්ෂාව හේතුවෙන්, උසස් අධිකරණ විනිසුරුවන්ගේ විශ්රාම වයස වෙනස් කිරීම වැනි කරුණකදී අධිකරණ බලයේ අවසාන භාරකරුවන් වන ජනතාවගේ සෘජු අනුමැතිය (ජනමත විචාරණයක්) අත්යවශ්ය වන බවද එම නිවේදනයේ සඳහන් වේ.
අන් රටවල මෙවැනි සංශෝධන සිදු කිරීමට පෙර දීර්ඝ හා විනිවිදභාවයෙන් යුත් පාර්ශ්වකරුවන්ගේ උපදේශන ක්රියාවලියක් පැවැත්වුවද, ශ්රී ලංකාවේදී ප්රධාන පාර්ශ්වකරුවන් සමඟ කිසිදු සාකච්ඡාවක් සිදු කර නොමැත. මෙලෙස අර්ථවත් උපදේශනයකින් තොරව මෙම යෝජනාව අසාමාන්ය ලෙස කඩිනමින් ඉදිරියට ගෙන යාම මඟින් මහජන විශ්වාසය පළුදු වන අතර, අනාගත රජයන්ට අධිකරණයේ ස්වාධීනත්වයට තමන්ට අවශ්ය පරිදි අතපෙවීම් කිරීමට මඟපාදන භයානක පූර්වාදර්ශයක් නිර්මාණය වන බවද ශ්රී ලංකා නීතිඥ සංගමය වැඩිදුරටත් පෙන්වා දෙයි.