ජාතික ඩෙංගු මර්දන ඒකකය නිකුත් කළ නවතම දත්තවලට අනුව, මේ වසරේ මේ දක්වා කාලය තුළ ශ්‍රී ලංකාව පුරා සමස්ත ඩෙංගු රෝගීන් සංඛ්‍යාව 107,651ක් දක්වා ඉහළ ගොස් තිබේ. මෙම වසංගත තත්ත්වය හේතුවෙන් මෙරට තුළ පුද්ගලයින් 81 දෙනෙකු ජීවිතක්ෂයට පත්ව ඇත.
නොවැම්බර් මාසයේ මුල් දින 7 තුළ පමණක් රෝගීන් 1,399ක් අලුතින් වාර්තා වී ඇති අතර, ඉන් පැහැදිලි වන්නේ රෝග ව්‍යාප්තිය තවදුරටත් ඉහළ මට්ටමක පවතින බවයි. මෙම වසරේ මාසිකව වැඩිම ඩෙංගු රෝගීන් ප්‍රමාණයක් (29,964ක්) වාර්තා වී ඇත්තේ ජූලි මාසයේදීය.
දිස්ත්‍රික් මට්ටමින් සලකා බැලීමේදී ගම්පහ, කොළඹ සහ මහනුවර යන දිස්ත්‍රික්කවලින් වැඩිම රෝගීන් සංඛ්‍යාවක් වාර්තා වී තිබේ. තවද, මේ වන විට දිවයින පුරා සෞඛ්‍ය වෛද්‍ය නිලධාරී (MOH) කොට්ඨාස 37ක් අධි අවදානම් කලාප ලෙස හඳුනාගෙන ඇත.
මෙම වර්ධනය වන අවදානම් සහගත තත්ත්වය පාලනය කිරීමේ අරමුණින්, ජාතික ඩෙංගු මර්දන ඒකකයේ වැඩබලන අධ්‍යක්ෂ වෛද්‍ය කපිල කන්නන්ගර මහතා ප්‍රකාශ කළේ අද (09) දින සිට විශේෂ මදුරු මර්දන වැඩසටහනක් ක්‍රියාත්මක කරන බවයි.