යාපනය, නල්ලූර් ප්‍රදේශයේ එල්.ටී.ටී.ඊ. හිටපු සාමාජිකයෙකු වන රාසයියා පාර්තිපන් (තිලීපන්) ගේ ප්‍රතිමාවක් ඉදිකිරීමේ සිද්ධිය සම්බන්ධයෙන් සිදුවන පරීක්ෂණවලට අදාළව දේශපාලනඥයින් ඇතුළු පුද්ගලයින් 14 දෙනෙකුගෙන් ප්‍රකාශ සටහන් කරගෙන ඇති බව ශ්‍රී ලංකා පොලිසිය පවසයි.
පාර්ලිමේන්තුව අද (21) ඇමතූ මහජන ආරක්ෂක අමාත්‍ය ආනන්ද විජේපාල මහතා සඳහන් කළේ, මෙම ප්‍රතිමාව සඳහා මුදල් ප්‍රතිපාදන ලබාදීම, ඉදිකිරීම, ප්‍රචාරණය කිරීම සහ ඊට අදාළ උත්සව සංවිධානය කිරීමට සම්බන්ධ බවට චෝදනා එල්ල වූ පුද්ගලයින්ගෙන් මෙලෙස ප්‍රකාශ ලබාගෙන ඇති බවයි.
මෙම සිදුවීම සම්බන්ධයෙන් පොලිසිය පරීක්ෂණයක් ආරම්භ කර ඇති අතර, තිලීපන් යනු දෙමළ ඊළාම් විමුක්ති කොටි (LTTE) සංවිධානයේ සාමාජිකයෙකු බව එහිදී තහවුරු වී ඇති බව අමාත්‍යවරයා පැවසීය.
වැඩිදුරටත් අදහස් දැක්වූ අමාත්‍යවරයා කියා සිටියේ පොලිසිය විසින් අදාළ ප්‍රතිමාව භාරයට ගෙන නඩු භාණ්ඩයක් ලෙස අධිකරණයට ඉදිරිපත් කර ඇති අතර, නීතිපතිවරයාගේ උපදෙස් මත ඉදිරි නීතිමය පියවර ගනිමින් සිටින බවයි.
තිලීපන්ගේ 39 වන ගුණසමරුව අවසන් වූ පසුදින, එනම් සැප්තැම්බර් 27 වන දින යාපනයේ තිලීපන් අනුස්මරණ චතුරශ්‍රයෙන් මෙම ප්‍රතිමාව ඉවත් කිරීම සම්බන්ධයෙන් විපක්ෂ පාර්ලිමේන්තු මන්ත්‍රී අර්චුනා රාමනාදන් මහතා යොමු කළ ප්‍රශ්නයකට පිළිතුරු දෙමින් මහජන ආරක්ෂක අමාත්‍යවරයා මේ බව සඳහන් කළේය.
මීට පෙර කැබිනට් මාධ්‍ය ප්‍රකාශක සහ අමාත්‍ය නලින්ද ජයතිස්ස මහතා සඳහන් කළේ අදාළ ප්‍රතිමාව ඉවත් කිරීමට පෙර පොලිසිය ඒ පිළිබඳ කරුණු අධිකරණයට වාර්තා කර තිබූ බවයි. එල්.ටී.ටී.ඊ. සංවිධානය ඇතුළු තහනම් සංවිධාන ප්‍රවර්ධනය කිරීම ශ්‍රී ලංකා නීතියට අනුව තහනම් බවද ඔහු මෙහිදී පෙන්වා දුන්නේය.
ඉන්දීය රජය වෙත ඉල්ලීම් කිහිපයක් ඉදිරිපත් කරමින් නල්ලූර්හිදී උපවාසයක නිරත වූ තිලීපන්, 1987 සැප්තැම්බර් මාසයේදී මියගියේය.