පාකිස්තානයේ බන්ධනාගාරගතව සිටින හිටපු අග්‍රාමාත්‍ය ඉම්රාන් ඛාන් වෛද්‍ය ප්‍රතිකාර ඉල්ලයි.

0
8

පාකිස්තානයේ බන්ධනාගාරගත කර සිටින හිටපු අග්‍රාමාත්‍ය ඉම්රාන් ඛාන්, තම සෞඛ්‍ය තත්ත්වය දැඩි ලෙස පිරිහෙමින් පවතින බව පවසමින් හදිසි වෛද්‍ය ප්‍රතිකාර ලබා දෙන ලෙස ඉල්ලීමක් කර තිබේ.

74 හැවිරිදි ඔහු සිය නීතිඥ සල්මාන් සෆ්දාර් මාර්ගයෙන් ප්‍රසිද්ධ කළ ලිපියක සඳහන් කර ඇත්තේ, තමාගේ මෙන්ම සිය බිරිඳ වන බුෂ්රා බිබීගේද සෞඛ්‍ය තත්ත්වය අඛණ්ඩව පිරිහීමට ලක්ව ඇති බවයි. පවතින මෙම අවදානම් තත්ත්වය හමුවේ තමන්ට නැවත ජීවතුන් අතර පැමිණීමට පවා නොහැකි වනු ඇතැයි ඔහු එමගින් බරපතළ අනතුරු ඇඟවීමක් ද සිදු කර ඇත.

වෛද්‍ය උපදෙස් අනුව තමා මොළයේ රුධිර වහනයකට සහ හෘදයාබාධයකට ලක්වීමේ ඉහළ අවදානමක පසුවන බවත්, දැනටමත් සිය හදවතට හානි සිදුව ඇති බවත් ඉම්රාන් ඛාන් පෙන්වා දෙයි. මීට අමතරව ඔහුගේ දකුණු ඇසේ පෙනීම බොහෝ දුරට අහිමි වී ඇති නමුත් ඒ සඳහා බන්ධනාගාර බලධාරීන් නිසි ප්‍රතිකාර ලබා නොදෙන බවට පවුලේ ඥාතීහු චෝදනා කරති.

දිනකට පැය 22ක කාලයක් හුදකලා සිරමැදිරියක රඳවා සිටින තමාට පවුලේ සාමාජිකයන් හමුවීමට හෝ පොත්පත්, රූපවාහිනී පහසුකම් භාවිත කිරීමට අවසර නොලැබෙන බව ඔහු සිය ලිපියෙන් හෙළි කර තිබේ. පසුගිය වසර පුරාම සිය නීතිඥවරුන් හමුවීමට අවස්ථාව ලැබී ඇත්තේ සිව් වතාවක් පමණක් වන අතර, මෙම තත්ත්වය සිය මානසික සෞඛ්‍යයට දැඩි පීඩනයක් එල්ල කර ඇති බව ඔහු වැඩිදුරටත් සඳහන් කරයි.

කෙසේ වෙතත්, මෙම සියලු චෝදනා ප්‍රතික්ෂේප කරන පාකිස්තාන බලධාරීන් පවසන්නේ ඉම්රාන් ඛාන්ට අවශ්‍ය සියලුම වෛද්‍ය සහ අනෙකුත් පහසුකම් නිසි පරිදි සපයා ඇති බවයි. ඔහු සතිපතා වෛද්‍ය පරීක්ෂණවලට යොමු කෙරෙන බවත්, පසුගිය සතියේ ඇසේ ප්‍රතිකාර සඳහා රජයේ රෝහලකට යොමු කළ අවස්ථාවේදී ඔහුගේ සෞඛ්‍ය තත්ත්වය ස්ථාවර මට්ටමක පවතින බව වෛද්‍යවරුන් තහවුරු කළ බවත් ඉස්ලාමාබාද් බලධාරීහු අවධාරණය කරති.

2018 සිට 2022 දක්වා පාකිස්තාන අග්‍රාමාත්‍ය ධුරය හෙබවූ හිටපු ක්‍රිකට් නායක ඉම්රාන් ඛාන් 2023 අගෝස්තු මාසයේ සිට බන්ධනාගාරගතව සිටී. දේශපාලන පළිගැනීම් මත තමන්ට එරෙහිව නඩු 100කට අධික සංඛ්‍යාවක් ගොනු කර ඇති බව ඔහුගේ මතයයි. මේ අතර, හිටපු ජාත්‍යන්තර ක්‍රිකට් නායකයන් කිහිපදෙනෙකු ද පාකිස්තාන අග්‍රාමාත්‍ය ෂෙබාස් ෂරීෆ්ගෙන් ඉල්ලා ඇත්තේ ඉම්රාන් ඛාන්ට නිසි වෛද්‍ය ප්‍රතිකාර ලබා දෙන ලෙසයි. මෙම තත්ත්වය හමුවේ ඔහුගේ පවුලේ සාමාජිකයන් සහ ආධාරකරුවන් අතර දැඩි නොසන්සුන්තාවක් සහ කනස්සල්ලක් මතුව ඇති බව බී.බී.සී (BBC) පුවත් සේවය වාර්තා කරයි.

LEAVE A REPLY

Please enter your comment!
Please enter your name here