අමෙරිකානු මධ්‍යවාර මැතිවරණයේ ප්‍රතිඵල සහ AI (කෘතිම බුද්ධි) ක්ෂේත්‍රයේ වර්ධනය මන්දගාමී වනු ඇතැයි යන බිය හේතුවෙන් ලොව ප්‍රධාන පෙළේ තාක්ෂණික සමාගම්වල කොටස් මිල ගණන් දැවැන්ත ලෙස පහත වැටී ඇති අතර, එයින් ඩොලර් ට්‍රිලියන ගණනක වෙළෙඳපොළ වටිනාකමක් අහිමි වී තිබේ.
කෘතිම බුද්ධි ක්ෂේත්‍රයේ වේගවත් ව්‍යාප්තිය පාලනය කිරීම ප්‍රධාන තේමාව කරගනිමින් ප්‍රචාරණ කටයුතු සිදු කළ ඩිමොක්‍රටික් පක්ෂය මැතිවරණයෙන් ජයග්‍රහණය කිරීම මෙම තත්ත්වයට මූලික හේතුවයි. මෙම පසුබෑම හමුවේ අමෙරිකාවේ ‘Nasdaq’ දර්ශකය 5.5% කට වඩා වැඩි ප්‍රමාණයකින් පහත වැටුණු අතර, ‘Dow Jones’ දත්තයන්ට අනුව ඉන් සිදුවූ සමස්ත වෙළෙඳපොළ වටිනාකම් පාඩුව ඩොලර් ට්‍රිලියන 2.5 කි. AI පහසුකම් සඳහා කරන දැවැන්ත ආයෝජනවලින් අපේක්ෂිත ප්‍රතිඵල ලැබේද යන්න පිළිබඳ ආයෝජකයින් තුළ පැවැති සැකයද මෙම තත්ත්වය තවත් තීව්‍ර කර ඇති අතර, මෙය 2025 වසරෙන් පසු වාර්තා වූ විශාලතම එක්දින කොටස් වෙළඳපොළ කඩාවැටීමක් ලෙස සැලකේ.
අමෙරිකානු කොටස් වෙළෙඳපොළේ මෙම පසුබෑමේ සෘජු බලපෑම ආසියානු වෙළෙඳපොළ වෙතද දැඩි ලෙස එල්ල වී තිබේ. AI තාක්ෂණයට අවශ්‍ය පරිගණක චිප් සහ උපාංග නිෂ්පාදනය කරන ආසියානු සමාගම්වල කොටස් මිල ගණන් පහත වැටීම නිසා අද (6) උදෑසන වන විට ආසියාවේ ප්‍රධාන කොටස් දර්ශකයන් හි විශාල කඩාවැටීමක් වාර්තා විය.
ඒ අනුව ජපානයේ ‘Nikkei 225’ දර්ශකය 6% කින් පහත වැටුණු අතර, එහි ප්‍රමුඛ පෙළේ සමාගම් වන ‘Kioxia’ කොටස් 12.6% කින් සහ ‘Tokyo Electron’ කොටස් 9.5% කින් පහත වැටුණි. එසේම, කොරියාවේ ‘Samsung’ සමාගම 10% කට ආසන්න ප්‍රමාණයකින් පහත වැටීම නිසා ‘Kospi’ දර්ශකය 8.5% කට වඩා කඩා වැටුණු අතර, එහි කොටස් වෙළඳාම තාවකාලිකව අත්හිටුවීමට (‘Circuit breaker’) පවා සිදුවිය. මීට අමතරව, තායිවානයේ ‘Taiex’ දර්ශකය 8.3% කින් සහ ලොව ප්‍රමුඛතම චිප් නිෂ්පාදකයා වන ‘TSMC’ හි කොටස් අගය 8.5% කින් පමණ පහත වැටී ඇත.
AI යටිතල පහසුකම් සඳහා කෙරෙන අධික පිරිවැය සහ ආයෝජන පිළිබඳ ආයෝජකයින් තුළ පවතින දිගුකාලීන නොසන්සුන්භාවය මෙම ගෝලීය කඩා වැටීම තුළින් මනාව තහවුරු වන බව ‘MarketWatch’ තාක්ෂණික විග්‍රහකයෝ පෙන්වා දෙති.