ශ්රී ලංකාවේ පැවැත්වෙන මංගල උත්සව, සාද, ආයතනික උත්සව, DJ සංදර්ශන ඇතුළු විවිධ උත්සවයන්හිදී හිමිකම් සහිත (copyrighted) සංගීතය වාදනය කිරීමට පෙර බලපත්ර ලබා ගැනීම අනිවාර්ය කරමින් නව රෙගුලාසි සමූහයක් හඳුන්වා දී තිබේ.
ජාතික බුද්ධිමය දේපළ කාර්යාංශය (NIPO) යටතේ ක්රියාත්මක වන ශ්රී ලංකා නිර්මාණකරුවන්ගේ සහ ප්රකාශකයින්ගේ සංගමය (ACPOSL) විසින් හඳුන්වා දෙන ලද මෙම නව නීති පද්ධතිය පසුගිය අඟහරුවාදා සිට ක්රියාත්මක විය.
මේ අනුව, සංගීතමය වැඩසටහන් පවත්වන හෝ සංගීතය වාදනය කරන හෝටල් සහ අනෙකුත් ආයතන ඒ සඳහා අදාළ බලපත්ර ලබා ගත යුතු අතර, උත්සවයේ ස්වභාවය සහ සහභාගී වන පිරිසගේ ප්රමාණය මත පදනම්ව එම බලපත්ර ගාස්තුව රුපියල් 20,000 සිට රුපියල් 125,000 දක්වා වෙනස් වේ.
මෙම නීතිය දැනට අදාළ වන්නේ ACPOSL සංගමය මඟින් නියෝජනය කරන ශ්රී ලාංකේය සංගීත නිර්මාණ සඳහා සහ ඉන්දියානු ප්රසාංගික හිමිකම් සංගමය (IPRS) හරහා නියෝජනය වන හිංදි සහ දෙමළ සංගීතය සඳහා පමණි. ඉංග්රීසි හෝ වෙනත් විදේශීය සංගීතය පමණක් වාදනය වන උත්සව සඳහා දැනට මෙම බලපත්රය අනිවාර්ය නොවේ.
ACPOSL සංගමයට අනුව මංගල උත්සව, පුද්ගලික සාද, ආයතනික උත්සව, රාත්රී භෝජන සංග්රහ, සම්මාන උළෙලවල්, නිෂ්පාදන එළිදැක්වීම්, සංගීතය සහිත සම්මන්ත්රණ, DJ සංදර්ශන, සජීවී සංගීත ප්රසංග සහ අනෙකුත් සියලුම සංගීතමය වැඩසටහන් මෙම රෙගුලාසිවලට යටත් වේ.
බලපත්ර ගාස්තු අය කෙරෙන ආකාරය:
-
DJ සංදර්ශන සඳහා:
-
සහභාගී වන්නන් 100 ට අඩු: රු. 20,000
-
සහභාගී වන්නන් 100 – 300 අතර: රු. 30,000
-
සහභාගී වන්නන් 300 ට වැඩි: රු. 40,000
-
-
සජීවී (Live Band) සංගීත උත්සව සඳහා:
-
සහභාගී වන්නන් 100 ට අඩු: රු. 25,000
-
සහභාගී වන්නන් 100 – 300 අතර: රු. 35,000
-
සහභාගී වන්නන් 300 ට වැඩි: රු. 50,000
-
-
පුද්ගලික හෝ ආයතනික DJ උත්සව සඳහා:
-
පිළිවෙළින් රු. 25,000, රු. 40,000 සහ රු. 50,000
-
-
ආයතනික මට්ටමේ සජීවී හෝ සංකීර්ණ (Hybrid) සංගීත උත්සව සඳහා:
-
පිළිවෙළින් රු. 50,000, රු. 75,000 සහ රු. 125,000
-
සන්ඩේ ටයිම්ස් පුවත්පත වෙත අදහස් දක්වමින් ACPOSL සභාපති නිලාර් එන්. කාසිම් මහතා සඳහන් කළේ, ගායක ගායිකාවන්ට හිමිවන ඇගයීමට සාපේක්ෂව පසුපස සිටින තනු නිර්මාණකරුවන්ට, ගේය පද රචකයින්ට සහ ප්රකාශකයින්ට නිසි කතෘ භාගය (royalties) සාධාරණ ලෙස ලබා දීම තහවුරු කිරීම මෙම ක්රමවේදයේ ප්රධාන අරමුණ බවයි.
මෙම බලපත්ර ක්රමය ප්රධාන වශයෙන් වාණිජ මට්ටමින් සංවිධානය කරන උත්සව සඳහා ක්රියාත්මක වන අතර, සුළු පරිමාණයේ ශිල්පීන් සහ උත්සව සඳහා යම් සහනයක් හිමිවන බවද ඒ මහතා වැඩිදුරටත් පැවසීය.
නව රෙගුලාසිවලට අනුව, තම පරිශ්රයන්හි පැවැත්වෙන උත්සව සඳහා අදාළ සංගීත බලපත්රය ලබාගෙන තිබේදැයි පරීක්ෂා කිරීමේ වගකීම හෝටල් වෙත පැවරේ. එමෙන්ම, උත්සවයෙන් පසු වාදනය කළ සංගීතය හඳුනා ගැනීම සඳහා අදාළ ශ්රව්ය පටිගත කිරීමක් (audio recording) ලබා දීමටද සංවිධායකයින්ට සිදුවිය හැක.
උත්සවවලට අමතරව සුපිරි වෙළඳසැල්, බැංකු, සිල්ලර වෙළඳසැල්, සාප්පු සංකීර්ණ, සිනමාහල් සහ කාර්යාල ගොඩනැගිලි වැනි වාණිජ ස්ථාන සඳහා මෙන්ම බස් රථ, සංචාරක වෑන් රථ සහ මගී දුම්රිය ඇතුළු පොදු ප්රවාහන සේවාවන් සඳහාද මෙම සංගීත බලපත්ර නීතිය අදාළ වේ.
එවැනි වාණිජ ස්ථාන සඳහා ගොඩනැගිල්ලේ ප්රමාණය සහ අදාළ පළාත් පාලන බල ප්රදේශය අනුව වාර්ෂික බලපත්ර ගාස්තුවක් නියම කෙරෙනු ඇත. නිර්මාණකරුවන්ගේ සහ අයිතිවාසිකම් හිමියන්ගේ කතෘ භාගය සුරක්ෂිත කරමින්, බුද්ධිමය දේපළ අයිතිය ශක්තිමත් කිරීම මෙම නව වැඩපිළිවෙළේ මූලික අරමුණයි.