තහනම් කරන ලද ‘පැන් මසාලා’ (pan masala) නිෂ්පාදන වක්රාකාරයෙන් ප්රවර්ධනය කිරීම සම්බන්ධයෙන් ප්රසිද්ධ බොලිවුඩ් නළුවන් වන ෂාරුක් ඛාන්, අජේ දේව්ගන් සහ ටයිගර් ෂ්රොෆ් වෙත මහාරාෂ්ට්ර ප්රාන්ත ආහාර සුරක්ෂිතතා අංශය (FDA) මගින් නොතීසි නිකුත් කර ඇත. ‘විමල් ඉලයිචි’ (Vimal Elaichi) වෙළෙඳ නාමය යටතේ සිදුකරන මෙම ප්රවර්ධන කටයුතු සම්බන්ධයෙන් නිකුත් කර ඇති පිටු නවයකින් යුත් අදාළ නොතීසිය මගින් ප්රධාන කරුණු කිහිපයක් අනාවරණය කර තිබේ.
මහාරාෂ්ට්ර ප්රාන්තය තුළ පැන් මසාලා නිෂ්පාදනය, ගබඩා කිරීම, බෙදා හැරීම සහ විකිණීම සම්පූර්ණයෙන්ම තහනම් කර ඇත. ‘විමල්’ වෙළෙඳ නාමය හරහා නොමඟ යවන සුළු ලෙස මෙම තහනම් නිෂ්පාදනය වක්රාකාරයෙන් ප්රවර්ධනය කරන බවට අදාළ නොතීසියෙන් චෝදනා කර ඇත.
අදාළ දැන්වීම් වහාම අත්හිටුවීමටත්, නළුවන්ගේ නිල සමාජ මාධ්ය ගිණුම්වල ඇති සියලුම ප්රවර්ධන අන්තර්ගතයන් වහාම ඉවත් කිරීමටත් නියෝග කර ඇත.
මාර්ගෝපදේශ උල්ලංඝනය කිරීම සම්බන්ධයෙන් ඉන්දීය රුපියල් ලක්ෂ 10 සිට ලක්ෂ 50 දක්වා දඩ මුදලක් නියම විය හැකි අතර, වසර තුනක් දක්වා වෙළෙඳ දැන්වීම්වල පෙනී සිටීම තහනම් කිරීමේ හැකියාවද පවතී.
මීට පෙර 2022 වසරේදී නළු අක්ෂේ කුමාර් ද මෙවැනිම දැන්වීමකට පෙනී සිටීම නිසා එල්ල වූ දැඩි මහජන විරෝධය හමුවේ එම ප්රවර්ධන කටයුතුවලින් ඉවත් වීමට පියවර ගත්තේය.