ලංකා IOC සහ සයිනොපෙක් (Sinopec) සමාගම් විසින් 95 ඔක්ටේන් පෙට්‍රල් ලීටරයක මිල රුපියල් 20 කින් ඉහළ නැංවීමට තීරණය කර ඇති අතර, එම මිල සංශෝධනය ඊයේ මධ්‍යම රාත්‍රියේ සිට ක්‍රියාත්මක වේ. මෙම නවතම මිල සංශෝධනයත් සමඟ එම සමාගම් දෙකෙහිම 95 ඔක්ටේන් පෙට්‍රල් ලීටරයක මිල රුපියල් 495 සිට රුපියල් 515 දක්වා ඉහළ යනු ඇත.
මේ අනුව, රාජ්‍ය අංශයට අයත් ලංකා ඛනිජ තෙල් නීතිගත සංස්ථාවෙන් (Ceypetco) මෙම වර්ගයේ පෙට්‍රල් මිලදී ගන්නා වාහන හිමියන්ට වඩා රුපියල් 25 ක වැඩි මුදලක්, ලංකා IOC සහ සයිනොපෙක් සමාගම්වලින් 95 ඔක්ටේන් පෙට්‍රල් මිලදී ගැනීමේදී ගෙවීමට සිදුවේ.
මෙම මාසය මුලදී සිදුකළ රුපියල් 15 ක මිල ඉහළ නැංවීමත් සමඟ, ලංකා ඛනිජ තෙල් නීතිගත සංස්ථාව දැනට 95 ඔක්ටේන් පෙට්‍රල් ලීටරයක් අලෙවි කරනු ලබන්නේ රුපියල් 490 කටයි. මීට පෙර ඔක්තෝබර් අග භාගයේදී ද ලංකා IOC සහ සයිනොපෙක් සමාගම් විසින් 95 ඔක්ටේන් පෙට්‍රල් ලීටරයක මිල රුපියල් 20 කින් ඉහළ නංවා රුපියල් 495 දක්වා වැඩි කර තිබුණි.