1979 අංක 48 දරන ත්රස්තවාදය වැළැක්වීමේ (තාවකාලික විධිවිධාන) පනත (PTA) අහෝසි කර, ඒ වෙනුවට “ත්රස්තවාදයෙන් රාජ්යය ආරක්ෂා කිරීමේ පනත් කෙටුම්පත” (Protection of the State from Terrorism Bill) රජය විසින් ගැසට් පත්රයේ පළ කර තිබේ.
සැප්තැම්බර් 18 වැනිදාතමින් යුතුව නිකුත් කරන ලද අතිවිශේෂ ගැසට් පත්රය හරහා ප්රකාශයට පත් කෙරුණු මෙම නව පනත් කෙටුම්පත මගින් ත්රස්තවාදී වැරදි, අත්අඩංගුවට ගැනීම්, විමර්ශන, රැඳවුම් නියෝග සහ නඩු පැවරීම් සම්බන්ධයෙන් නව නීතිමය රාමුවක් හඳුන්වා දී ඇත.
පනත් කෙටුම්පතේ ප්රධාන කරුණු:
-
අරමුණ සහ බලපෑම: ශ්රී ලංකාව තුළ හෝ පිටත සිදුවන ත්රස්ත ක්රියාවලින් ජාතික ආරක්ෂාව සහ මහජනතාව ආරක්ෂා කිරීම මෙම නීතියේ ප්රධාන අරමුණයි. එමෙන්ම විදේශයන්හි සිදුවන ත්රස්ත ක්රියා සඳහා ශ්රී ලාංකීය භූමිය භාවිත කිරීම වැළැක්වීම ද මෙයට ඇතුළත් වේ. මෙම නීතිය ශ්රී ලාංකික පුරවැසියන් මෙරටදී හෝ විදේශයන්හිදී සිදුකරන වැරදි මෙන්ම, විදේශයන්හි පිහිටි ශ්රී ලංකා රාජ්ය දේපොළ සහ තානාපති කාර්යාල ඉලක්ක කරගනිමින් සිදුකරන අපරාධ සඳහා ද බලපැවැත්වේ.
-
ත්රස්තවාදය අර්ථ නිරූපණය: දේශපාලන හෝ මතවාදීමය අරමුණක් වෙනුවෙන් මහජනතාව තුළ භීතියක් ඇතිකිරීමට හෝ රජයක්/ජාත්යන්තර සංවිධානයක් යම් ක්රියාවක් කිරීමට හෝ නොකර සිටීමට බලපෑම් කිරීමේ පරමාර්ථයෙන් සිදුකරන ක්රියා ත්රස්තවාදී වැරදි ලෙස අර්ථ දක්වා ඇත. මරණය හෝ බරපතළ තුවාල සිදුකිරීම, ප්රාණ ඇපයට ගැනීම, පොදු යටිතල පහසුකම්වලට හානි කිරීම, දැවැන්ත පරිසර හානි, තීරණාත්මක පද්ධති වෙත එල්ල වන සයිබර් ප්රහාර සහ ජාත්යන්තර ත්රස්ත විරෝධී සම්මුතීන්ට අයත් වැරදි මෙයට ඇතුළත් වේ.
-
දඬුවම් ප්රමාණයන්:
-
මරණය සිදුකිරීමට හේතුවන ත්රස්ත ක්රියාවලට වරදකරු වන අයට ජීවිතාන්තය දක්වා සිරදඬුවම් හිමිවේ.
-
සෙසු ත්රස්තවාදී වැරදි සඳහා වසර 20 දක්වා සිරදඬුවම් සහ රුපියල් මිලියන 20 දක්වා දඩ නියම කළ හැකිය.
-
තහනම් සංවිධානවලට බඳවා ගැනීම්, අරමුදල් සැපයීම්, පුහුණු කිරීම් හෝ උපකාර කිරීම් වෙනුවෙන් වසර 15 දක්වා සිරදඬුවම් සහ රුපියල් මිලියන 15 දක්වා දඩ නියම කළ හැක.
-
-
විරෝධතා සහ මාධ්ය නිදහසට ආරක්ෂාව: උද්ඝෝෂණ, වර්ජන, වෘත්තීය සමිති ක්රියාමාර්ග, අදහස් ප්රකාශ කිරීම, විවේචන සහ මානුෂීය කටයුතුවල නිරත වීම පමණක් ත්රස්තවාදී වරදක් ලෙස නොසැලකෙන බව පනතේ දක්වා ඇත. මාධ්යවේදය, පර්යේෂණ, කලාත්මක නිර්මාණ, හාස්ය උත්පාදන සහ ප්රජාතන්ත්රවාදී විවේචන සඳහා ආරක්ෂාව සලසා ඇති අතර, ඒවා සෘජුවම ත්රස්තවාදයට අනුබල දීමක් නොවිය යුතුය.
-
අත්අඩංගුවට ගැනීම් සහ රැඳවුම් නියෝග: අත්අඩංගුවට ගන්නා අයෙකුට ඊට හේතුව සහ නීතිඥ සහාය ලබාගැනීමේ අයිතිය දැනුම් දිය යුතුය. එමෙන්ම, ඒ පිළිබඳව ඔහුගේ ළඟම ඥාතියාට සහ ශ්රී ලංකා මානව හිමිකම් කොමිෂන් සභාවට දැනුම් දීම අනිවාර්ය වේ.
-
සැකකරුවෙකු පැය 48ක් ඇතුළත මහේස්ත්රාත්වරයෙකු වෙත ඉදිරිපත් කළ යුතුය.
-
වැඩිදුර විමර්ශන සඳහා පොලිස්පතිවරයාගේ ඉල්ලීම මත අදාළ අමාත්යාංශයේ ලේකම්වරයාට මාස 2 බැගින් වන රැඳවුම් නියෝග (Detention Orders) නිකුත් කළ හැක.
-
උපරිම රැඳවුම් කාලය වසර 1ක් වන අතර, මුල් මාස 2න් පසු රැඳවුම් කාලය දීර්ඝ කිරීමට මහාධිකරණයේ අනුමැතිය අවශ්ය වේ.
-
-
ස්වාධීන සමාලෝචන කමිටුව සහ පරීක්ෂණ: විශ්රාමික ශ්රේෂ්ඨාධිකරණ හෝ අභියාචනාධිකරණ විනිසුරුවරයෙකුගේ සභාපතිත්වයෙන් යුත් ස්වාධීන සමාලෝචන කමිටුවක් මගින් රැඳවුම් නියෝග පරීක්ෂාවට ලක්කෙරේ. සැකකරුවන්ට හිරිහැර හෝ වධහිංසා සිදුවී ඇති බවට සැක පහළ වුවහොත් වෛද්ය පරීක්ෂණ පැවැත්වීමට ද, මහේස්ත්රාත්වරුන්ට සහ මානව හිමිකම් නිලධාරීන්ට රැඳවුම් මධ්යස්ථාන නිරීක්ෂණය කිරීමට ද අවස්ථාව සලසා ඇත.
මෙම පනත් කෙටුම්පත පාර්ලිමේන්තුවේදී සම්මත වීමෙන් අනතුරුව, මෙතෙක් බල පැවැත්වුණු PTA පනත සම්පූර්ණයෙන්ම අහෝසි වී මෙම නව නීතිමය රාමුව ක්රියාත්මක වනු ඇත.