කැනඩාවේ බෞද්ධ උරුමය මෙන්ම භික්ෂුණී සංඝයාගේ ජීවමාන උරුමය ඉස්මතු කරමින් ඓතිහාසික සන්ධිස්ථානයක් සනිටුහන් කරමින්, කැනඩා සෙනෙට් සභාවේ කථානායක ගරු රේමොන්ඩ් ගාග්නේ මහත්මිය විසින් විසිත සිරින් ලීලාරත්න මහතා ප්‍රමුඛ බෞද්ධ සංස්කෘතික නියෝජිත පිරිසක් පසුගිය ඔක්තෝබර් 8 වැනිදා සෙනෙට් සභා ශාලාවේදී නිල වශයෙන් පිළිගනු ලැබීය.
කාන්තා ඉතිහාස මාසයට සමගාමීව සංවිධානය කෙරුණු මෙම විශේෂ අවස්ථාව, ගරු සෙනෙට් සභික යුවෙන් පාවු වූ මහතාගේ ආරාධනයෙන් සිදු වූ අතර, ඊට බෞද්ධ උරුම මාසයේ මුලපිරීම නියෝජනය කරන පිරිසක්ද එක්ව සිටියහ. එහිදී, බෞද්ධ උරුම මාසයේ කටයුතු සහ ගෝලීය භික්ෂුණී උරුම වැඩසටහන වෙනුවෙන් සෙනෙට් සභික යුවෙන් පාවු වූ මහතා දැක්වූ සහයෝගය අගයමින් ලීලාරත්න මහතා විසින් උන්වහන්සේ වෙත කෘතඥතා සහතිකයක් පිරිනමන ලදී. තවද, ප්‍රඥාව, සාමය සහ මිත්‍රත්වය සංකේතවත් කරමින් ශ්‍රී ලංකාවේ අතින් නිමවන ලද අලි රූපයක්ද මෙහිදී සංකේතාත්මකව තිළිණ කෙරිණි.
මෙම හමුවේදී බෞද්ධ උරුම මාසය තවදුරටත් පුළුල් කිරීම, ගෝලීය භික්ෂුණී සංඝයා ශක්තිමත් කිරීම සහ නායකත්වය, අධ්‍යාපනය මෙන්ම නවීන තාක්ෂණය අභිමුව බෞද්ධ ආචාර ධර්මවල ඇති වැදගත්කම පිළිබඳව පුළුල් ලෙස සාකච්ඡා විය. විශේෂයෙන්ම, පස්වැනි සියවසේදී (ක්‍රි.ව. 433) ශ්‍රී ලංකාවේ සිට චීනයේ නැන්ජිං නුවරට වැඩම කරමින් භික්ෂුණී පරම්පරාවක් ස්ථාපිත කිරීමට මූලික වූ භික්ෂුණී දේවසාරා ථේරියන් වහන්සේගේ (තිස්සරා) ඓතිහාසික මුහුදු ගමන මෙහිදී සිහිපත් කෙරිණි. වසර 1,600කට ආසන්න කාලයක් අඛණ්ඩව පැවත එන බෞද්ධ ඉතිහාසයේ කාන්තාවකගේ නායකත්වයෙන් සිදු වූ ප්‍රධානතම දිගුදුර මුහුදු ගමන් අතරට මෙම ගමන එක් වේ.
මෙම අඛණ්ඩ උරුමය ඉදිරියට ගෙනයමින්, Buddhist Heritage Month Inc. සහ Buddhist Embassy සංවිධානය කරන “Wisdom in Motion” වැඩසටහන යටතේ, “Tradition in Motion – Living Heritage” තේමාවෙන් යුත් විශේෂ වැඩසටහනක් ලබන ඔක්තෝබර් 17 වැනිදා කැනඩා පාර්ලිමේන්තු පරිශ්‍රයේදී පැවැත්වීමට නියමිතය. ඊට භික්ෂුණී අය්යා අලෝකා ථේරියන් වහන්සේද සහභාගී වීමට නියමිතව ඇත.
කැනඩා සෙනෙට් සභාවේ මෙම සුවිශේෂී නිල පිළිගැනීම තුළින්, බෞද්ධ සංස්කෘතික උරුමය, කාන්තා නායකත්වය මෙන්ම කැනඩාව පුරා විසිරී සිටින බෞද්ධ ප්‍රජාවන්ගේ අමිල දායකත්වය ජාතික මට්ටමින් ඇගයීමට ලක්ව තිබේ.