ලොව සුප්රකට පෘතුගාල පාපන්දු තරුවක් වන ක්රිස්ටියානෝ රොනාල්ඩෝ (Cristiano Ronaldo), සිය දීර්ඝ කාලීන සහකාරිය වූ සුප්රසිද්ධ මොඩල් සහ ඉන්ෆ්ලුවෙන්සර්වරියක වන ජෝර්ජිනා රොඩ්රිගෙස් (Georgina Rodríguez) සමඟ පෘතුගාලයේදී පැවැති පෞද්ගලික සිවිල් ලියාපදිංචි උත්සවයකදී විවාහ පත්ව තිබේ.
මෙම සුවිශේෂී අවස්ථාව සලකුණු කරමින් රොනාල්ඩෝ සිය ඉන්ස්ටග්රෑම් (Instagram) ගිණුමට ඡායාරූපයක් එක්කර තිබූ අතර, එහි දක්නට ලැබුණේ විවාහ මුදු පැළඳ සිටින දෙදෙනාගේ අත්දෙක එක මත එක තබා ඇති ආකාරයයි. එම ඡායාරූපය පළ කර විනාඩි 30ක් ඇතුළත මිලියන 3කට අධික ප්රතිචාර (Likes) සංඛ්යාවක් ලැබී තිබිණි.
පෘතුගාල මාධ්ය වාර්තාවලට අනුව, “වසරේ විවාහ මංගල්යය” ලෙස හැඳින්වෙන මෙම පෞද්ගලික උත්සවය අගෝස්තු 11 වන දින ලිස්බන් නුවර ආසන්නයේ පිහිටි කැස්කයිස් (Cascais) නම් වෙරළබඩ නගරයේදී පැවැත්වුණු අතර, ඊට ඔවුන්ගේ දරුවන් පස්දෙනා ද සහභාගී වී සිටියහ.
මීට වසරකට පෙර, එනම් පසුගිය වසරේ (2025) අගෝස්තු 11 වන දින ඔවුන් දෙදෙනාගේ විවාහ ගිවිස ගැනීම නිල වශයෙන් නිවේදනය කර තිබුණි. එම අවස්ථාවේදී ජෝර්ජිනා විශාල මංගල මුදුවක ඡායාරූපයක් එක් කරමින්, “ඔව්, මම කැමතියි. මෙම ආත්මයේදී වගේම මගේ සෑම ආත්මයකදීම” යැයි ස්පාඤ්ඤ භාෂාවෙන් සටහන් කර තිබිණි.
මෙම යුවළගේ වසර 10ක ප්රේම කතාව ඇරඹෙන්නේ මැඩ්රිඩ් නුවර ගුචි (Gucci) විලාසිතා ආයතනයකදීය. එදින ජෝර්ජිනා එහි සේවය කරමින් සිටි අතර, රොනාල්ඩෝ එවකට ස්පාඤ්ඤයේ රියල් මැඩ්රිඩ් (Real Madrid) ක්රීඩා සමාජය නියෝජනය කරමින් සිටියේය.
තමන්ගේ වෘත්තීය පාපන්දු ජීවිතය තුළ ගෝල 1,000කට ආසන්න සංඛ්යාවක් ලබාගෙන ඇති රොනාල්ඩෝ, ලිස්බන්හි ස්පෝර්ටින්, මැන්චෙස්ටර් යුනයිටඩ්, රියල් මැඩ්රිඩ්, යුවෙන්ටස්, සවුදි අරාබියේ අල්-නසර් සහ පෘතුගාල ජාතික කණ්ඩායම වෙනුවෙන් ක්රීඩා කර ඇත. මෑතකදී ඔහු සිය 6 වන ලෝක කුසලාන තරගාවලියට සහභාගී වූ අතර, එය පිරිමි ලෝක කුසලාන ඉතිහාසයේ ක්රීඩකයෙකු තැබූ වැඩිම සහභාගීත්වයේ වාර්තාවයි (එම වාර්තාව අර්ජන්ටිනාවේ ලියොනෙල් මෙසී සමඟ සමව බෙදා ගනී).