2026 වසරේ මුල් මාස හය ශ්රී ලංකාවේ අපනයන ක්ෂේත්රය ඉතා ඉහළ ප්රගතියක් අත්කරගත් කාල පරිච්ඡේදයක් බවට පත්ව තිබේ. ඒ අනුව ජනවාරි සිට ජූනි දක්වා කාලය තුළ භාණ්ඩ හා සේවා යන අංශ දෙකෙහිම සමස්ත අපනයන ආදායම ඇමෙරිකානු ඩොලර් බිලියන 9 සීමාව ඉක්මවා යමින් ඩොලර් මිලියන 9,012.24ක් ලෙස සටහන් වී ඇත. මෙය 2025 වසරේ අදාළ කාලසීමාවට සාපේක්ෂව සියයට 8ක කැපී පෙනෙන වර්ධනයකි. මෙහිදී ප්රධාන වශයෙන්ම භාණ්ඩ අපනයන අංශය සියයට 8.95ක ඉහළ යාමක් පෙන්වමින් ඩොලර් මිලියන 7,073.31ක ආදායමක් උපයා ඇති අතර, සේවා අපනයන අංශයද සියයට 4.49ක වර්ධනයක් සමඟින් ඩොලර් මිලියන 1,938.94ක දායකත්වයක් ලබා දී තිබේ.
විශේෂයෙන්ම 2026 ජූනි මාසය පමණක් සැලකීමේදීද සමස්ත අපනයන ආදායම පසුගිය වසරේ ජූනි මාසයට වඩා සියයට 12.53ක වර්ධනයක් පෙන්වමින් ඇමෙරිකානු ඩොලර් මිලියන 1,658.62ක් දක්වා ඉහළ ගොස් ඇත. ඉන් ඩොලර් මිලියන 1,314.10ක් භාණ්ඩ අපනයනයෙන් (සියයට 15.09ක වර්ධනයක්) සහ ඩොලර් මිලියන 344.52ක් සේවා අපනයනයෙන් (සියයට 3.75ක වර්ධනයක්) වශයෙන් උපයා තිබේ. මෙම විදේශ විනිමය ඉපැයීම් ඉහළ නැංවීම සහ අපනයන ආදායම් විවිධාංගීකරණය කිරීම සඳහා තොරතුරු හා සන්නිවේදන තාක්ෂණය (ICT/BPM), ඉදිකිරීම්, මූල්ය සේවා මෙන්ම ප්රවාහන සහ සැපයුම් වැනි දැනුම මත පදනම් වූ සේවා කර්මාන්ත ලබාදුන් දායකත්වය අතිශයින්ම කැපී පෙනේ.
ලෝක වෙළෙඳපොළේ පවතින විවිධ අභියෝග හමුවේ වුවද දේශීය අපනයනකරුවන් දැක්වූ ඉහළ තරගකාරීත්වය මෙම සාර්ථකත්වයට මූලික වූ බව ශ්රී ලංකා අපනයන සංවර්ධන මණ්ඩලයේ සභාපති සහ ප්රධාන විධායක නිලධාරී මංගල විජේසිංහ මහතා ප්රකාශ කරයි. එමෙන්ම, ඉදිරි වසර කිහිපය ඉලක්ක කරගත් 2026–2030 ජාතික අපනයන සංවර්ධන සැලැස්ම (NEDP) ක්රියාත්මක කරමින්, අපනයන ක්ෂේත්රයේ නවෝත්පාදන, වෙළෙඳපොළ විවිධාංගීකරණය සහ අගය එකතු කළ නිෂ්පාදන දිරිමත් කිරීමටත්, ඒ හරහා ශ්රී ලංකාවේ ආර්ථිකය තවදුරටත් ශක්තිමත් කිරීමටත් අපනයන සංවර්ධන මණ්ඩලය කැපවී සිටින බවද ඔහු වැඩිදුරටත් අවධාරණය කර සිටී.