මැදපෙරදිග යුද්ධයේ ආරම්භයේදී ඉරානයේ මිනාබ් (Minab) නගරයේ ප්රාථමික පාසලකට එල්ල වූ දරුණු ඇමෙරිකානු ප්රහාරයකින් ජීවිතක්ෂයට පත් වූවන් සිහිපත් කරමින්, ඉරාන ලෝක කුසලාන පාපන්දු කණ්ඩායම මෙක්සිකෝව වෙත පැමිණීමේදී විශේෂ ඇඳුම් ආයිත්තම් කට්ටලයකින් සැරසී සිටි බව ජාත්යන්තර මාධ්ය වාර්තා කරයි.
පසුගිය ඉරිදා මෙක්සිකෝවේ ටිහුවානා (Tijuana) ගුවන්තොටුපළෙන් ගුවන් යානයෙන් බැසීමේදී ඉරාන ක්රීඩකයන් තම නිල කබායන්හි “168” අංකය සඳහන් රන් පැහැති පින් (Pins) පැළඳ සිටියහ.
මෙම අංකයෙන් සංකේතවත් කරන්නේ පසුගිය පෙබරවාරි 28 වැනිදා දකුණු ඉරානයේ මිනාබ්හි පිහිටි පාසලකට එල්ල වූ ප්රහාරයෙන් මියගිය, බහුතරයක් කුඩා දරුවන්ගෙන් සමන්විත 168 දෙනෙකුගෙන් යුත් අහිංසක පිරිසයි. හංගේරියාවේ පිහිටි ඉරාන තානාපති කාර්යාලය ද සඳුදා දින සමාජ මාධ්ය සටහනක් තබමින් මෙම සිදුවීම තහවුරු කර තිබේ.
විප්ලවීය ආරක්ෂක බලකා (Revolutionary Guard) කඳවුරකට ආසන්නව පිහිටි මෙම පාසලට එල්ල වූ ප්රහාරය, ඉරාන කණ්ඩායම විසින් මීට පෙරද තුර්කියේ අන්තාලියා (Antalya) නුවර පැවැති පෙරහුරු තරඟයකදී සිහිපත් කර තිබුණි. එහිදී ජාතික ගීය වාදනය වන අවස්ථාවේදී ක්රීඩකයන් රෝස සහ දම් පැහැති පාසල් බෑග් දල්වාගෙන සිටිමින් තම විරෝධය සහ ශෝකය ප්රකාශ කළහ.
මෙම පාසල් ප්රහාරයේ වගකීම ඇමෙරිකාව හෝ ඊශ්රායලය මෙතෙක් භාරගෙන නොමැත. කෙසේ වෙතත්, මෙම ප්රහාරය ජාත්යන්තරයේ දැඩි දෝෂදර්ශනයට ලක්ව ඇති අතර, ඇමෙරිකානු හමුදාව ප්රකාශ කරන්නේ තමන් කිසිවිටෙකත් සිවිල් වැසියන් ඉලක්ක නොකරන බවත්, මේ පිළිබඳව පුළුල් පරීක්ෂණයක් පවත්වන බවත්ය.