එක්සත් ජාතීන්ගේ මහා මණ්ඩලයේ 80 වන සැසිවාරයට සහභාගී වීමට නිව්යෝර්ක් නුවරට පැමිණ සිටින ජනාධිපති අනුර කුමාර දිසානායක මහතා ඊයේ (26) පස්වරුවේ නිව්යෝර්ක් හි එක්සත් ජාතීන්ගේ මූලස්ථානයේදී එක්සත් ජාතීන්ගේ මහලේකම් ඇන්ටෝනියෝ ගුටරෙස් මහතා හමුවිය.
එක්සත් ජාතීන්ගේ මූලස්ථානයට පැමිණි ජනාධිපතිවරයා මහලේකම්වරයා උණුසුම් ලෙස පිළිගත් අතර, පසුව නායකයින් දෙදෙනා සුහද සාකච්ඡාවක් පැවැත්වූ බව ජනාධිපති මාධ්‍ය අංශය (PMD) පැවසීය.
මෙම හමුව අතරතුර, ශ්‍රී ලංකාවේ නව ආර්ථික ප්‍රතිසංස්කරණවල ප්‍රගතිය මෙන්ම රටේ ආර්ථික, සමාජීය සහ දේශපාලන සංවර්ධනය ඉදිරියට ගෙන යාම අරමුණු කරගත් රජයේ ප්‍රධාන මුලපිරීම් පිළිබඳව ජනාධිපති දිසානායක මහතා පැහැදිලි කළේය.
ශ්‍රී ලංකා රජයේ නව ප්‍රගතිශීලී වැඩසටහනට මහලේකම්වරයා ප්‍රශංසා කළ අතර, එක්සත් ජාතීන්ගේ සංවිධානය එයට සහයෝගය දක්වන බවත් එහි පූර්ණ සහයෝගය ලබා දෙන බවත් තහවුරු කළේය.
විදේශ කටයුතු, විදේශ රැකියා සහ සංචාරක අමාත්‍ය විජිත හේරත්, එක්සත් ජාතීන්ගේ ශ්‍රී ලංකා නිත්‍ය නියෝජිත, හිටපු අගවිනිසුරු සහ ජනාධිපති නීතිඥ ජයන්ත ජයසූරිය යන මහත්වරුන් සහ විදේශ කටයුතු අමාත්‍යාංශයේ ජ්‍යෙෂ්ඨ නිලධාරීන් ද මෙම රැස්වීමට සහභාගී වූහ.