2025 ජාතික මිලාද්-උන්-නබි උත්සවය වෙනුවෙන් ජාතික ඒකාබද්ධතා නියෝජ්‍ය අමාත්‍ය මුනීර් මුලාශ්‍ර මහතා සුබ පැතුම් පණිවිඩයක් නිකුත් කර තිබේ.
එම පණිවිඩය මෙසේය.
දේවදූත මුහම්මද් (ඔහුට සාමය ලැබේවා) තුමාණන්ගේ උපත සනිටුහන් කරන ජාතික මිලාද්-උන්-නබි උත්සවය වෙනුවෙන් සියලුම ශ්‍රී ලාංකිකයින්ට, විශේෂයෙන් ලෝකවාසී මුස්ලිම් ප්‍රජාවටත් මගේ හෘදයාංගම සුබ පැතුම් පිරිනැමීමට ලැබීම මට ඉමහත් සතුටකි.
මිලාද්-උන්-නබි යනු, මුස්ලිම්වරුන් විසින් අල්ලාහ්ගේ අවසාන දූතයා සහ සියලු මනුෂ්‍ය වර්ගයාට මඟ පෙන්වන්නෙකු ලෙස සලකනු ලබන මුහම්මද් (ඔහුට සාමය ලැබේවා) තුමාණන්ගේ උපත සහ විපත සිහි කිරීමයි. එහි වැදගත්කම අධ්‍යාත්මික සහ සමාජීය මානයන් දෙකෙහිම පවතී. ඒකීය සර්ව බලධාරී දෙවිදානන් කෙරෙහි ඇදහිල්ල, දයාව, යුක්තිය සහ සමාජ සාධාරණත්වය මත කේන්ද්‍රගත වූ ඉස්ලාමයේ පණිවිඩය ගෙන ආ නබිතුමාගේ උපතට මෙම දිනය ගෞරව කරයි. එය මුස්ලිම්වරුන්ට දේවදූත මුහම්මද් (ඔහුට සාමය ලැබේවා) තුමාණන්ගේ ආදර්ශමත් චරිතය, ඔහුගේ කරුණාව, නිහතමානිකම සහ නායකත්වය ගැන මෙනෙහි කිරීමට අවස්ථාවක් සපයයි. එමෙන්ම දේවදූත මුහම්මද් තුමාගේ සාමයේ පණිවිඩය හරහා ඉවසීම, සමානාත්මතාවය සහ අන් අයට සේවය කිරීම අවධාරණය කරන අතර සමස්තයක් වශයෙන් මනුෂ්‍යත්වයට ආගමික සීමාවන් ඉක්මවා යන මෙම අකාලික වටිනාකම් මතක් කරයි.
ශ්‍රී ලංකාව ඇතුළු බොහෝ රටවල, මිලාද්-උන්-නබි දිනය ජාතික නිවාඩු දිනයක් ලෙස පිළිගෙන ඇති අතර, එය දේවදූත මුහම්මද් (ඔහුට සාමය ලැබේවා) තුමන්ට සහ මුස්ලිම් ප්‍රජාවට කරන ගරු කිරීමක් සහ අන්තර් ආගමික සහජීවනයේ වැදගත්කම සංකේතවත් කරයි. මිලාද්-උන්-නබි යනු උත්සවශ්‍රීයෙන් සැමරීමට කටයුතු කිරීම පමණක් නොව, මුස්ලිම්වරු වශයෙන් අපි සියලුදෙනා දේවදූත මුහම්මද් තුමන්ගේ ආදර්ශමත් ජීවිතය, අනුකම්පාව, යුක්තිය, අවංකභාවය සහ මනුෂ්‍යත්වයට සේවය කිරීම වැනි ගුණාංග ප්‍රගුණ කර ගැනීමටත් කැපවිය යුතුයි.
ශ්‍රී ලංකාවේ විවිධ දිස්ත්‍රික්කවල පවත්වනු ලබන වාර්ෂික ජාතික මිලාද්-උන්-නබි උත්සවය, දිවයින පුරා සැමරීම තුළින් මුස්ලිම් ප්‍රජාව තුළ සාමුහිකත්වය ශක්තිමත් කරනවා පමණක් නොව, අන්තර් සංස්කෘතික සංවාදයක් ද පෝෂණය කරන අතර ශ්‍රී ලංකාව පොහොසත් කරන විවිධත්වයක් ප්‍රදර්ශනය කරයි. මෙම වසරේ ජාතික මිලාද්-උන්-නබි උත්සවය ජනාධිපති අනුර කුමාර දිසානායක මහතාගේ මුලිකත්වයෙන් හම්බන්තොට දිස්ත්‍රික්කයේ පැවැත්වෙන බැවින් එයට අමතර අර්ථයක් ලැබේ. හම්බන්තොට දිස්ත්‍රික්කය තෝරා ගැනීම, අපගේ රටේ විවිධ ප්‍රදේශවලට ජාතික සැමරුම් සමීප කරවීමට අපගේ සාමූහික උත්සාහය පිළිබිඹු කරන අතර එමඟින් ශ්‍රී ලංකාවේ බහු-ආගමික සහ බහු-වාර්ගික ස්වභාවය සහ එකමුතුකමේ ආත්මය ශක්තිමත් කරයි.
මෙම ආශිර්වාද ලත් අවස්ථාවේදී, අපි සියලුදෙනා දේවදූත මුහම්මද් තුමාගේ (ඔහුට සාමය ලැබේවා) කල්පවත්නා පණිවිඩය මෙනෙහි කරමු. ගෞරවාන්විතව ජීවත් වීම, යුක්තිය ආරක්ෂා කිරීම, අවදානමට ලක්විය හැකි අය ආරක්ෂා කිරීම සහ අනාගත පරම්පරාවන් සඳහා සාමය ආරක්ෂා කරන ශ්‍රී ලංකාවක් ගොඩනැගීමට අපි සියලුදෙනා මෙම මිලාද්-උන්-නබි දිනයේ අදිටන් කර ගනිමු.
උපුටා ගැනීම අවසන්.