NEWSNOW | – ශ්‍රී ලංකා ගුවන් හමුදාව සිය වෙබ් අඩවිය BestWeb.lk 2025 තරඟාවලියේ දී ජයග්‍රහණ ත්‍රිත්වයකින් සරසයි.
ශ්‍රී ලංකා ගුවන් හමුදාවේ නිල වෙබ් අඩවිය වන www.airforce.lk, LK වසම් රෙජිස්ට්‍රිය විසින් සංවිධානය කළ BestWeb.lk 2025 තරඟයේ සමස්ත රන් සම්මානය දිනා ගනිමින් අතිවිශිෂ්ට ජයග්‍රහණයක් සනිටුහන් කළේය තවද, ගුවන් හමුදා වෙබ් අඩවිය රජයේ වෙබ් අඩවි කාණ්ඩයේ රන් සම්මානය සහ හොඳම ජංගම පරිශීලක අත්දැකීම් සම්මානය ද දිනා ගනිමින් ත්‍රිත්ව ජයග්‍රහණයක් හිමිකර ගන්නා ලදි.
සම්මාන උළෙල පසුගියදා (27) ශ්‍රී ජයවර්ධනපුර කෝට්ටේ මොනාක් ඉම්පීරියල් හෝටලයේදී පැවැත්විණි.
ප්‍රධාන ආරාධිත අමුත්තා ලෙස ඩිජිටල් ආර්ථික අමාත්‍යාංශයේ වැඩබලන ලේකම් වරුණ ශ්‍රී ධනපාල මහතා සහභාගී වූ අතර, පිළිගැනීමේ කතාව LK වසම් ලේඛකාධිකාරී මහාචාර්ය ගිහාන් ඩයස් මහතා විසින් පවත්වමින් ශ්‍රී ලංකාවේ සංවර්ධනය සඳහා ඩිජිටල් තාක්ෂණයේ වැදගත්කම ද අවධාරණය කරන ලදි.
2009 වසරේ සිට දිගින් දිගටම රජයේ වෙබ් අඩවි කාණ්ඩයෙන් රන්, රිදී සහ ලෝකඩ සම්මාන දිනාගත් airforce.lk වෙබ් අඩවිය, නිසි නඩත්තු සහ නිරන්තර යාවත්කාලීන ක්‍රියාවලිය මත පදනම්ව BestWeb.lk 2025 තරඟයේ සමස්ත රන් සම්මානයත් හිමිකර ගනිමින් ගුවන් හමුදාව සඳහා අභිමානවත් ජයග්‍රහණයක් සටහන් කළේය.
මෙම අවස්ථාවට ගුවන් හමුදාව නියෝජනය කරමින් ඉලෙක්ට්‍රොනික හා පරිගණක ඉංජිනේරු අධ්‍යක්ෂ ජනරාල් එයාර් වයිස් මාර්ෂල් අසිත හෙට්ටිආරච්චි, ගුවන් හමුදා මාධ්‍ය අධ්‍යක්ෂ ගෲප් කැප්ටන් එරන්ද ගීගනගේ, තොරතුරු තාක්ෂණ අධ්‍යක්ෂ ගෲප් කැප්ටන් චානක සූරියආරච්චි, ගෲප් කැප්ටන් සම්පත් කුමාර සහ විංග් කමාන්ඩර් පසන් ගුණසේකර ඇතුළු නිලධාරීන් පිරිසක් සහභාගී වූහ.