මුස්ලිම් සිවිල් සංවිධාන නායකයින් සහ රජයේ නියෝජිතයින් අතර තුන්වන සාකච්ඡාව පසුගිය 26 වන දා අමාත්‍ය විජිත හේරත් මහතාගේ ප්‍රධානත්වයෙන් පැවැත්විණි. මුස්ලිම් ප්‍රජාව මුහුණ පාන ගැටලු තවදුරටත් අධ්‍යයනය කිරීම සඳහා පැවැති මෙම සාකච්ඡාව සඳහා ජාතික ඒකාබද්ධතා නියෝජ්‍ය අමාත්‍ය මුනීර් මුලෆ්ෆර්, පාර්ලිමේන්තු මන්ත්‍රී මුහම්මදු අස්ලම්, පාර්ලිමේන්තු මන්ත්‍රී ෆස්මින් ෂෙරීෆ් හා පාර්ලිමේන්තු මන්ත්‍රී අර්කම් ඉලියාස් යන මහතුන් ද සහභාගී වූහ.
මහර බන්ධනාගාරයේ පිහිටි පල්ලිය, එකල පල්ලිය, ආගමික ග්‍රන්ථ ආනයනය කිරීමේ දී මුහුණපාන අපහසුතා, හෙද ශිෂ්‍යයාවන් සහ රෝහල්වල හෙදියන්ගේ අනිවාර්ය නිල ඇදුම සම්බන්ධයෙන් මුස්ලිම් කාන්තාවන්ට මුහුණපෑමට සිදුව ඇති ගැටලු වැනි පෙර රැස්වීමේදී සාකච්ඡාවට පත්වූ කරුණු මෙවරත් සාකච්ඡාවට ලක්වූහ.
ආගමික සංචාරකයින් වශයෙන් ශ්‍රී ලංකාවට පැමිණෙන වන්දනාකරුවන් වීසා ලබා ගැනීමේ දී පිළිපැදිය යුතු දීර්ඝ ක්‍රියාවලිය නිසා ඇති වන ප්‍රමාදය පිළිබඳව ද සිවිල් සංවිධාන නායකයින් අමාත්‍ය විජිත හේරත් මහතාගේ අවධානයට යොමු කළහ. ඒ සම්බන්ධයෙන් ආරක්ෂක අමාත්‍යංශය සහ ආගමන හා විගමන දෙපාර්තුමේන්තුව සමඟ සාකච්ඡා කර යෝග්‍ය විසඳුමක් ලබා දීමට කටයුතු කරන බව ද අමාත්‍ය විජිත හේරත් මහතා පෙන්වා දුන්නේය.
මීට අමතරව නිවෙස්වල සිදුවන මරණ අවසන් කටයුතු සිදු කිරීම ප්‍රමාද වීමට හේතු වී ඇති කාරණා වැනි කරුණු කිහිපයක් ද මෙහි දී සාකච්ඡා විය.
එමෙන් ම මෙවර ජාතික මිලාද්-දූන් නබි උත්සවය ගරු ජනාධිපතිතුමාගේ ප්‍රධානත්වයෙන් හම්බන්තොට බෝලාන මස්ජිදුල් අරුසියා ජුම්මා දේවස්ථානයේ පැවැත්වීමට සැලසුම් කර ඇති බවත් සිවිල් සංවිධාන නායකයින් හමුවේ දැනුම් දෙනු ලැබී ය.
මුස්ලිම් සිවිල් සංවිධාන නායකයින් නියෝජනය කරමින් මවුලවිවරුන්, සමස්ත ලංකා ජම්ඉයියතුල් උලමා සංවිධානය ඇතුළු සංවිධාන 15ක් නියෝජනය කරමින් නියෝජිතයින් 30ක් සාකච්ඡාවට එක්ව සිටියහ.
