සෞදි අරාබියේ මක්කම නගරයේ පිහිටි මුස්ලිම් පල්ලියක් තුළ අශෝභන ක්‍රියාවල නිරත වීම හේතුවෙන් වරදකරුවන් වූ බංග්ලාදේශ ජාතික පිරිමි පුද්ගලයෙකු සහ කාන්තාවක් එරටදී මරණ දඬුවමට ලක් කර තිබේ.
සෞදි අභ්‍යන්තර කටයුතු අමාත්‍යාංශය නිවේදනය කර ඇත්තේ නස්රුල් ඉස්ලාම් අබ්දුල් බසීර් සහ සිටි අක්තාර් යන බංග්ලාදේශ ජාතිකයන් දෙදෙනා මෙලෙස මරණ දඬුවමට මුහුණ දී ඇති බවයි.
මක්කම පල්ලියක සිදු වූ මෙම සිදුවීම සම්බන්ධයෙන් ලැබුණු තොරතුරු මත ආරක්ෂක අංශ විසින් වියාපෘතිය ක්‍රියාත්මක කර ඔවුන්ව වහාම අත්අඩංගුවට ගෙන තිබිණි.
පසුව සිදු කරන ලද දීර්ඝ විමර්ශනවලින් අනතුරුව සැකකරුවන්ට එරෙහිව අධිකරණය හමුවේ චෝදනා ගොනු කළ අතර, එහිදී ඔවුන් චෝදනාවලට වරදකරුවන් බවට තහවුරු වීමත් සමඟ මරණ දඬුවම නියම කළ බව සෞදි පුවත් ඒජන්සිය වාර්තා කරයි.
ඉස්ලාමීය ෂරියා නීතිය යටතේ විනිසුරුවරයාගේ අභිමතය පරිදි ලබා දෙනු ලබන ‘තආසීර්’ නමැති දඬුවම් විධිවිධානය යටතේ මෙම මරණ දඬුවම නියම කර ඇත.
අදාළ අධිකරණ තීන්දුව උසස් අධිකරණ මඟින් තහවුරු කිරීමෙන් සහ අදාළ රාජකීය නියෝගය නිකුත් වීමෙන් පසුව මෙම දඬුවම ක්‍රියාත්මක කර ඇති බව විදෙස් මාධ්‍ය වැඩිදුරටත් පෙන්වා දෙයි.
මූලාශ්‍රය – GULF NEWS