දකුණු චීන මුහුදේ පවතින මතභේදාත්මක තත්ත්වයන් සම්බන්ධයෙන් අදහස් දැක්වීමට හෝ විනිශ්චයන් ලබා දීමට ජපානයට කිසිදු සදාචාරාත්මක හෝ නීතිමය අයිතියක් නොමැති බව චීනය දැඩිව ප්රකාශ කර සිටී. චීන විදේශ කටයුතු අමාත්යාංශයේ ආසියානු කටයුතු දෙපාර්තමේන්තු නිලධාරියෙකු විසින් බීජිං නුවර පිහිටි ජපාන තානාපති කාර්යාලයේ ප්රධාන අමාත්යවරයා කැඳවා මේ බව දැනුම් දී ඇත. දකුණු චීන මුහුදු කලාපය ආශ්රිතව ජපානයට පැහැදිලි ඓතිහාසික වගකීම් සමුදායක් පැවතුණ ද, ඔවුන් ඒවා මුළුමනින්ම පැහැර හරිමින් කටයුතු කර ඇති බැවින් මෙම ගැටලුවලට මැදිහත් වීමට ඔවුන්ට ඉඩ දිය නොහැකි බව චීන පාර්ශ්වය එහිදී පෙන්වා දී තිබේ.
මෙම රාජ්යතාන්ත්රික කැඳවීම සිදු කර ඇත්තේ ඊනියා “දකුණු චීන මුහුදු බේරුම්කරණ තීන්දුව” ප්රකාශයට පත් කර වසර 10ක් සපිරීම නිමිත්තෙන් ජපාන විදේශ අමාත්යවරයා එය නැවතත් හුවා දැක්වීමට පියවර ගැනීම සහ වෙනත් රටවල් කිහිපයක් සමඟ එක්ව ඒකාබද්ධ නිවේදනයක් නිකුත් කිරීමෙන් අනතුරුවය. ජපානයේ මෙම ක්රියාකලාපය කෙරෙහි සිය දැඩි අප්රසාදය සහ විරෝධය පළ කරමින් චීන විදේශ කටයුතු අමාත්යාංශය අදාළ ජපාන නිලධාරියා වෙත බරපතළ ලෙස කරුණු ඉදිරිපත් කර ඇත. එහිදී චීනය අවධාරණය කළේ ජපානයේ මෙවැනි අශෝභන ප්රකාශයන් පශ්චාත් යුද ජාත්යන්තර ක්රියාපටිපාටියට මෙන්ම ජාත්යන්තර නීතියේ ආධිපත්යයට ද සෘජු අභියෝගයක් වන බවයි.
එමෙන්ම, ජපානයේ මෙම දෙබිඩි පිළිවෙත දකුණු චීන මුහුදු කලාපයේ පවතින සාමය සහ ස්ථාවරත්වය සිතාමතාම අඩාල කරන්නක් වන අතර, එය කලාපීය රටවල පොදු අවශ්යතාවලට මුළුමනින්ම පටහැනි බව ද චීනය පවසයි. ජපානයේ වත්මන් හැසිරීම, ඔවුන් අතීතයේදී සිදු කළ ආක්රමණශීලී සහ යටත් විජිත ම්ලේච්ඡ ක්රියා පිළිබඳ අමිහිරි මතකයන් යළි අවදි කරන්නක් බවත්, එය චීනය ඇතුළු ජාත්යන්තර ප්රජාව තුළ දැඩි කෝපයක් මෙන්ම තැතිගැන්මක් ඇති කරන බවත් එහිදී පෙන්වා දී ඇත. එබැවින්, ජපානයේ මෙවැනි ප්රකෝප කිරීම්වලට අධිෂ්ඨානශීලීව මුහුණ දෙමින් තමන්ගේ භෞමික ස්වෛරීභාවය මෙන්ම සමුද්රීය අයිතිවාසිකම් ස්ථිරවම ආරක්ෂා කරන බව චීනය අවධාරණය කරයි.
මීට අමතරව, තායිවාන ගැටලුව, ජපානය විසින් චීන භූමියේ අතහැර දමා ගොස් ඇති රසායනික අවි සහ චීනයේ වාර්ගික ප්රතිපත්ති වැනි සංවේදී කරුණු මුල් කරගනිමින් ජපාන පාර්ලිමේන්තු මන්ත්රීවරුන් සිදු කර ඇති පදනම් විරහිත ප්රකාශයන් කෙරෙහි ද චීනය සිය දැඩි විරෝධය පළ කර තිබේ. එරට හමුදාව සහ ආරක්ෂක අංශ මුල් කරගනිමින් මෑතකදී ජපානය තුළ දක්නට ලැබෙන ඍණාත්මක ප්රවණතා මාලාව පිළිබඳව ද චීන රාජ්යතාන්ත්රිකයින් මෙහිදී ජපාන පාර්ශ්වය වෙත සිය බලවත් කනස්සල්ල සහ විරෝධය නිල වශයෙන් දැනුම් දී ඇත.