1995 සිට 2013 දක්වා කටාර් රාජ්යය පාලනය කරමින්, එම බලශක්ති බහුල ගල්ෆ් කලාපීය රටේ නූතන සංවර්ධනයේ ප්රධාන නිර්මාණකරු ලෙස සැලකෙන හිටපු එමීර් (Father Emir) ෂීක් හමාඩ් බින් කලීෆා අල් තානි (Sheikh Hamad bin Khalifa Al Thani) මහතා අභාවප්රාප්ත වී තිබේ. මියයන විට ඒ මහතා 74 වැනි වියේ පසු විය.
කටාර් රාජ්යයේ රාජකීය අධිකරණය (Amiri Diwan) විසින් නිකුත් කරන ලද නිල නිවේදනයක දැක්වෙන්නේ, ඉරිදා උදෑසන ඒ මහතා අභාවප්රාප්ත වූ බවයි. මෙම මහා ජාතික අලාභය වෙනුවෙන් රාජකීය අධිකරණය සිය බලවත් කණගාටුව ප්රකාශ කර සිටී. මේ හේතුවෙන් රටේ ජාතික ධජය අඩකුඹු කර තැබීමට ද පියවර ගෙන ඇත.
ෂීක් හමාඩ්ගේ පාලන සමය තුළ කටාර් රාජ්යය ජාත්යන්තර ප්රජාව තුළ ඉහළ පිළිගැනීමක් ලබාගත් අතර ආර්ථික, සමාජීය සහ සංස්කෘතික වශයෙන් විශාල පරිවර්තනයකට ලක් විය. ඔහු දූරදර්ශී ආර්ථික ආයෝජන මෙන්ම පුළුල් ජාත්යන්තර සබඳතා ගොඩනැගීමට නායකත්වය දුන් අතර, ඔහුගේ පාලනය යටතේ කටාර් රාජ්යය ලොව විශාලතම ද්රව ස්වභාවික වායූ (LNG) අපනයනකරු බවට පත් විය.
කටාර් රාජ්යයේ දේශපාලන බලපෑම අද වන විට උතුරු අප්රිකාව, මැදපෙරදිග සහ ආසියාව ඇතුළු ලොව පුරා බොහෝ ප්රදේශවලට ව්යාප්ත වී ඇත. ලොව පුරා මිලියන සංඛ්යාත ජනයා නැරඹූ 2022 පිරිමි ෆීෆා (FIFA) ලෝක කුසලාන පාපන්දු තරඟාවලිය සඳහා සත්කාරකත්වය දැක්වීමට ද කටාර් රාජ්යයට හැකි වූයේ ඔහුගේ පාලන සමයේ දැමූ ශක්තිමත් පදනම හේතුවෙනි. එහි සමාරම්භක තරඟයේදී ක්රීඩා ලෝලීන්ගෙන් ඔහුට ඉහළ ප්රතිචාර හිමි විය.
එමෙන්ම 1996 වසරේදී ලොව ප්රමුඛතම මාධ්ය ජාලයක් වන ‘අල් ජසීරා’ (Al Jazeera) පුවත් නාලිකාව ආරම්භ කරන ලද්දේ ද ඔහුගේ පාලන සමයේදීය. 2004 වසරේදී කටාර් රාජ්යයේ පළමු ස්ථිර ආණ්ඩුක්රම ව්යවස්ථාව ප්රකාශයට පත් කිරීම සහ කාන්තාවන්ට ඡන්දය ප්රකාශ කිරීමට මෙන්ම අපේක්ෂකයන් ලෙස ඉදිරිපත් වීමට අවස්ථාව සලසා දෙමින් නගර සභා මැතිවරණ හඳුන්වා දීම ද ඔහු විසින් සිදු කරන ලද සුවිශේෂී ප්රතිසංස්කරණ වේ.
ගල්ෆ් කලාපීය පාරම්පරික පාලකයන් අතර ඉතා දුර්ලභ පියවරක් තබමින්, ඔහු 2013 වසරේදී ස්වේච්ඡාවෙන් සිය බලය එවකට 33 වැනි වියේ පසු වූ තම පුත් ෂීක් තමීම් බින් හමාඩ් අල් තානි (Sheikh Tamim bin Hamad Al Thani) වෙත පවරන ලදී.