පාස්කු ඉරිදා ත්රස්ත ප්රහාර පිළිබඳ විමර්ශනවලට අදාළව ත්රස්තවාදය වැළැක්වීමේ පනත යටතේ අත්අඩංගුවට ගෙන රඳවා තබා ගැනීමට එරෙහිව හිටපු රාජ්ය බුද්ධි සේවා ප්රධානී සුරේෂ් සලේ විසින් ඉදිරිපත් කරන ලද රිට් පෙත්සමට සහය දක්වමින් ගොනු කර ඇති සියලුම අතුරු පෙත්සම් ජූලි 17 වන දින කැඳවීමට අභියාචනාධිකරණය නියෝග කර තිබේ.
ජාතික සංවිධාන එකමුතුවේ කැඳවුම්කරු පූජ්ය බෙංගමුවේ නාලක හිමි, ආචාර්ය ගුණදාස අමරසේකර සහ තවත් පාර්ශව කිහිපයක් මෙම අතුරු පෙත්සම් ඉදිරිපත් කර ඇත.
මෙම පෙත්සම් අද (10) අභියාචනාධිකරණ සභාපති විනිසුරු රොහන්ත අබේසූරිය සහ විනිසුරු ප්රියන්ත ප්රනාන්දු ඉදිරියේ කැඳවන ලදී.
මෙම නඩු විභාගයේදී, වගඋත්තරකරුවන් වෙනුවෙන් පෙනී සිටි නියෝජ්ය සොලිසිටර් ජෙනරාල් සුහර්ෂි හේරත් අධිකරණයට කියා සිටියේ එවැනි අතුරු පෙත්සම් සලකා බැලිය හැක්කේ ප්රධාන පෙත්සම සම්බන්ධයෙන් අධිකරණය නොතීසි නිකුත් කළහොත් පමණක් බවයි.
මේ අතර, අතරමැදි පෙත්සම්කරුවන් වෙනුවෙන් පෙනී සිටි ජනාධිපති නීතිඥවරු තර්ක කළේ මෙම නඩුව දැනටමත් දැඩි මහජන අවධානයක් දිනාගෙන ඇති බවත් මැදිහත් වී කරුණු ඉදිරිපත් කිරීමට අවසර ඉල්ලා සිටි බවත්ය.
කෙසේ වෙතත්, අභියාචනාධිකරණ සභාපති විනිසුරු රොහන්ත අබේසූරිය මහතා ප්රකාශ කළේ, මෙම අතුරු අයදුම්පත් සලකා බැලීම සිදු කළ හැක්කේ පෙත්සම්කරු වෙනුවෙන් ජනාධිපති නීතිඥ සංජීව ජයවර්ධන මහතා විසින් කරුණු දැක්වීම් අවසන් කිරීමෙන් පසුව පමණක් බවයි.