කාන්තා T20 ක්රිකට් ලෝක කුසලාන තරගාවලියේ දෙවැනි අවසන් පූර්ව තරගයෙන් දකුණු අප්රිකානු කාන්තා කණ්ඩායම ලකුණු 40කින් පරාජය කළ එංගලන්ත කාන්තා කණ්ඩායම තරගාවලියේ අවසන් මහා තරගයට සුදුසුකම් ලබා ගැනීමට සමත් විය.
ලන්ඩනයේ ඕවල් ක්රීඩාංගණයේ පැවති මෙම තීරණාත්මක තරගයේ ප්රථමයෙන් පන්දුවට පහරදුන් එංගලන්ත කණ්ඩායම නියමිත පන්දුවාර 20 අවසානයේ කඩුලු 5ක් දැවී ලකුණු 169ක ප්රබල ලකුණු සංඛ්යාවක් රැස් කළේය. එහිදී විශිෂ්ට ඉනිමක් ක්රීඩා කළ නායිකා නැට් ස්කයිවර්-බ්රන්ට් පන්දු 47කින් හතරේ පහර 11ක් සහ එක් හයේ පහරක් සමඟ නොදැවී ලකුණු 75ක් රැස් කරමින් ඉනිමේ වැඩිම ලකුණු ලාභිනිය වූ අතර, හෙදර් නයිට් ලකුණු 58ක් ලබා ගනිමින් ඇයට මනා සහයෝගයක් ලබා දුන්නාය.
ලකුණු 170ක ජයග්රාහී ඉලක්කයක් හඹා යෑමට පිටියට පිවිසි දකුණු අප්රිකානු කාන්තා කණ්ඩායමට එංගලන්ත පන්දු යවන්නන්ගේ දක්ෂ පන්දු යැවීම හමුවේ නියමිත පන්දුවාර 20 අවසානයේ කඩුලු 8ක් දැවී රැස් කරගත හැකි වූයේ ලකුණු 129ක් පමණි.
දකුණු අප්රිකානු ඉනිම වෙනුවෙන් ටස්මින් බ්රිට්ස් ලකුණු 51ක් සහ නායිකා ලෝරා වොල්වාර්ඩ්ට් ලකුණු 17ක් රැස් කළ ද එය ජයග්රහණය සඳහා ප්රමාණවත් නොවීය. පන්දු යැවීමේදී එංගලන්ත කණ්ඩායම වෙනුවෙන් ලෝරන් බෙල් සහ චාලි ඩීන් කඩුලු දෙක බැගින් දවා ගත් අතර, ලින්සි ස්මිත් එක් කඩුල්ලක් බිඳ හෙලමින් එංගලන්ත කණ්ඩායමේ ජයග්රහණය තහවුරු කළාය.