NEWSNOW | – වන අලින්ට වෙඩි තැබීම් වලට විරුද්ධව නීති දැඩි කිරීමේ අරමුණෙන් වනජීවී දෙපාර්තමේන්තුවේ නිළධාරීන් සමඟ සාකච්ඡාවක් ඊයේ(15) පස්වරුවේ පරිසර අමාත්‍යංශයේ දී පැවැත්විණ. ඒ පරිසර අමාත්‍ය වෛද්‍ය දම්මික පටබැඳි සහ නියෝජ්‍ය අමාත්‍ය ඇන්ටන් ජයකොඩි මහත්වරුන්ගේ ප්‍රධානත්වයෙනි.
විශේෂයෙන් වන අලින්ට වෙඩි තැබීම් සිදුවීම් සම්බන්ධයෙන් නිරන්තරයෙන් වන ජීවී දෙපාර්තමේන්තුව වෙත කරුණු වාර්තා වෙන අතර වන අලින්ට සිදු කරන වෙඩි තැබිම්වලට විරුද්ධව නීතිය දැඩිව ක්‍රියාත්මක කිරීමට අවශ්‍ය කටයුතු සිදු කරන ලෙස ගරු පරිසර අමාත්‍යතුමා විසින් වනජීවී සංරක්ෂණ දෙපාර්තමේන්තුවේ අධ්‍යක්ෂ ජනරාල් වෙතඋපදෙස් ලබා දී තිබේ.
විශේෂයෙන් පුද්ගලික ඉඩම් කේනදා කර ගනිමින් නීති විරෝධී ලෙස ඉදිකර ඇති විදුලි වැටවල් සම්බන්ධයෙන් දැඩිව නීතිය ක්‍රියාත්මක කිරීම සඳහාත් වනසතුන් ඝාතනය කිරීමේ නීති යාවත්කාලීන කරමින් වරදකරුවන් වෙත දඩුවම් පැමිණවීමේ ක්‍රියාවලිය ශක්තිමත් කිරීම පිළිබඳ මෙහි දී සාකච්ඡා සිදු කරන ලදී.
අලි මිනිස් ගැටුමට විසඳුම් ලබා ගැනීම සඳහා මේ වන විට පරිසර අමාත්‍යංශය, වනජීවී දෙපාර්තමේන්තුව එක්ව සාධනීය විසඳුම් ලබා ලබා ගනිමින් පවතින අතර අලිමිනිස් ගැටුම් ප්‍රබල දිස්ත්‍රික්කයන් තෝරාගනිමින් අලි වැට ඉදිකිරීම් කටයුතු සිදු වේ.
එහි නඩත්තු කටයුතු සඳහා බහුකාර්ය නිළධාරීන් බඳවා ගැනීම සිදු කළ අතර සිවිල් ආරක්ෂක භටයන්ගේ සහය ද ඉදිරියේ දී ලබා ගැනීමට නියමිත බැවින් වන අලින්ට සිදුවන වෙඩි තැබීම් අවම කිරීම සඳහා ක්‍රියාමාර්ග ගනු ඇත.
මේ පිළිබඳ මහජනතාව දැනුවත් කිරීමේ විශේෂ මාධ්‍ය හමුවක් ඉදිරි දින කිහිපය තුළ පැවැත්වීමට කටයුතු කරන බව වනජීවී දෙපාර්තමේන්තුව විසින් දැනුම් දෙන ලදී.