NEWSNOW| – ශ්‍රී ලංකාව සහ තායිලන්තය අතර රාජතාන්ත්‍රික සබදතා වසර 70 ඉක්මවා පැවතීමත් , මෙරට සැමරීමට සූදානම් වන පොසොන් උත්සවයට සමගාමීව පැවැත්වීමට නියමිත පාද යාත්‍රාවකට සහභාගී වීම සදහාත් තායිලන්තයේ වට්ඛාන්චනග් බෞද්ධ විහාරස්ථානයේ විහාරධිපති ප්‍රාධිකාන් සුරපස් විභාතෝ හිමි ඇතුළු බෞද්ධ භික්ෂුන් වහන්සේලා 70 නමක් අද(06) පස්වරුවේ කටුනායක ගුවන් තොටුපොළ වෙත පැමිණියහ .
මෙම භික්ෂුන් වහන්සේලා පිරිස හෙට (07) දිනයේ ශ්‍රී පාද වන්දනා චාරිකාව නිරත වීමෙන් අනතුරුව , ලබන 10 දින සිට කතරගම කිරිවෙහෙර සිට අරභන ” සියම් දහම් පාද යාත්‍රාව” , එළඹෙන ජූලි 02 දින දක්වා වැලිවේරිය පාහියන් බෞද්ධ සංස්කෘතික මධ්‍යස්ථානය වෙත ලගා වීමට නියමිතය.
මෙම බෞද්ධ භික්ෂුන් වහන්සේලා පිරිස තායිලන්තයේ බැංකොක් නුවර සිට ශ්‍රී ලන්කන් ගුවන් සේවයේ යූ.එල්.- 405 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණි.
උන්වහන්සේලා පිළිගැනීම සදහා ශ්‍රී ලංකා ප්‍රවර්ධන කාර්යාංශයේ සහකාර අධ්‍යක්ෂ නිතිනි සේනානායක මහත්මිය ඇතුළු පිරිසක් ද කටුනායක ගුවන් තොටුපොළ වෙත පැමිණ සිටියහ .
(ටී.කේ.ජී. කපිල)
